Најмалку 13 лица загинаа во несреќи при капење низ Германија за време на викендот, откако екстремниот топлотен бран натера голем број луѓе да побараат разладување во езерата и реките.
Според полицијата, 27-годишен маж вчера се удавил во реката Некар во близина на Хајделберг. Триесетгодишен маж загинал во езеро за капење кај Нојхофен, јужно од Манхајм, додека уште двајца мажи ги загубиле животите во одделни водни површини во Берлин.
Шестгодишно дете се удавило во областа Хернер Мер на каналот Рајна–Херне во сојузната покраина Северна Рајна-Вестфалија. Во покраината Хесен, полицијата го пронашла телото на 40-годишен маж во езерото Валдзе Раунхајм, југозападно од Франкфурт.
Во петокот, 45-годишен маж бил извлечен од водата од посетители на езерото Зеепарк Линен кај Дортмунд, но подоцна им подлегнал на повредите во болница.
Полицијата соопшти и дека осумгодишно момче било пронајдено мртво по двочасовна потрага во езеро во Изернхаген, во близина на Хановер. Според првичните информации, детето пливало пред да исчезне под површината на водата.
Претходно, во петокот од Боденското Езеро биле извлечени и телата на двајца постари мажи, кои исчезнале еден ден претходно откако скокнале во водата пред очите на своите сопруги.
Во Германија веќе неколку дена се регистрираат температури што достигнуваат или надминуваат 40 Целзиусови степени, при што ноќните часови не носат значително разладување. Продолжениот топлотен бран дополнително ги загрозува ранливите категории население, а наглото влегување во студена вода при екстремни температури може сериозно да го оптовари кардиоваскуларниот систем. ссм/
