Американската војска потроши голем дел од своите глобални залихи на ракети со долг дострел и висока прецизност за време на петмесечната војна со Иран, според три лица запознаени со податоците, што предизвика загриженост за подготвеноста на војската за идни конфликти, објави на својот сајт агенцијата Ројтерс.
Тие ракети се првенствено копнени ракети на американската армија, познати како Армиски тактички ракетни системи (ATACMS) и Ракети за прецизен удар (PrSM). САД го користеле „скоро целото“ оружје, изјавија два извори за Ројтерс.
Досега нема извештаи за степенот до кој војската останува без ATACMS и Ракети за прецизен удар. Оваа муниција со долг дострел – чија цена надминува еден милион долари по парче – е важен дел од воениот арсенал, бидејќи овозможува прецизни напади од безбедно растојание. Ракетите ATACMS, испорачани од САД, одиграа клучна улога во војната во Украина, дозволувајќи им на украинските сили да се борат со цели во Русија. Ракетата PrSM претставува понова и понапредна генерација што ќе го замени ATACMS, кој има пократок дострел.
Драстичното намалување на залихите на прецизни ракети со долг дострел значи дека претседателот на СAД, Доналд Трамп, може повеќе да се потпре на поризични мисии со бомбардери со екипаж ако продолжи со напади од големи размери врз Иран. Изворите одбија да кажат колку од секој вид муниција им останало на САД.
