Воведена е втора смена во 13 градинки, а 20 работат и во саботите. Бројот ќе се зголемува како што ќе се овозможуваат услови и како што ќе се екипираат градинките, информираше денеска министерката за труд и социјална политика Мила Царовска.
Таа рече дека секаде каде што има потреба градинките ќе треба да воведат втора смена. Родителите преговараат и затоа општините треба да излезат во пресрет на потребите на граѓаните и да не постапуваат спротивно на нивните интереси, а тоа гледаме дека се случува, рече Царовска.
Министерката Царовска истакна дека отпор има само кај градоначалници кои како што рече, сакаат да манипулираат со јавноста пред локалните избори.
„Се видов со голем дел од директорките, имавме средба и јавно објавивме дека се подготвени и чувствуваат оти тоа е потреба на граѓаните и затоа ќе одговорат на оваа потреба, посочи министерката за труд и социјална политика.
Според Царовска, во градинките во државава моментно има потреба од над 2.300 вработувања. Тоа, укажува на систематско уништување на детската заштита во изминатите 11 години.
Со Синдикатот за образование, наука и култура и Министерството за финансии на состанок е утврдено дека е потребно обесштетување или враќање на вработувањата во градинките во континуитет.
„Сметаме дека наредната година ќе одиме со 10 отсто зголемување на вработувањата во градинките. Тоа ќе ни биде приоритетно за да можеме да одговориме на потребата, рече Царовска.
Таа појасни дека во градинките каде ќе се воведе втора смена ќе бидат потребни три до четири дополнителни вработувања за да биде одржлива и да се формира една група.
