Кандидатот на СДСМ за градоначалник на општина Бутел, Велимир Смилевски, вети изградба на нови патеки на двете страни од реката Серава.
„Со децении граѓаните на општина Бутел ги мачи проблемот со регулацијата на коритото на реката Серава. Благодарение на претходната локална власт, реката претставува синоним за депонија и дива фекална канализација. Претходната локална власт имаше ветено изработка на проект за етапна изградба на пешачки и велосипедски патеки во должина на едната страна на реката Серава, во населено место Живко Брајковски. Зошто и по 12 години не е уредено коритото на Серава? Нашето ветување е дека недостигот од пешачки и трим-патеки на територија на општина Бутел ќе го надоместиме со изградба на нови патеки на двете страни од реката Серава. Ќе се постави урбана опрема, како клупи, канти за отпадоци и ќе се изградат два пешачки моста. По целата патека по течението на реката ќе се постави економично улично ЛЕД-осветление и ќе може да се користи во ноќните часови. На дел од патеката ќе се постави надворешна урбана опрема за вежбање и рекреација. Со тоа ќе овозможиме социјализација на граѓаните и подобрување на навиките во насока на здрав живот“, рече Смилевски.
