Се уште останува отворено прашањето кој ќе ја наследи Катица Јанева на функцијата шеф на Специјалното јавно обвинителство.
Најсериозен кандидат за првото место во СЈО, според информациите на „Актуелно“, е Фатиме Фетаи.
Обвинителката Фетаи, вчера изјави дека СЈО продолжува со застапување на предметите во судница без разлика што на Јанева и е одредена мерка притвор за „Рекет“.
„Она што се случува може да биде само добар показател дека секој што се огрешил пред законот, мора да одговара, дека работите конечно се придвижуваат во позитивна насока во нашата држава и дека едноставно никој не е недопирлив“, рече таа.
Според неа, индивидуалната кривична одговорност на еден од обвинителите во СЈО не смее да биде изговор и оправдување да се заборави целокупниот криминал што беше направен во нашата држава во последниот период и да се запре борбата против него.
Патем, Фетаи потсети дека тимот на СЈО е целосно посветен на борбата за правда и оти ќе продолжат со застапување на предметите во судница.
Во меѓувреме, по приведувањето на Јанева, СЈО е обезглавено. а неговата судбина не е решена, поради застојот во преговорите меѓу власта и опозицијата за законот за Јавно обвинителство, каде се решава неговиот статус.
Според републичкиот јавен обвинител Љубомир Јовески, кој се повикува на Законот за јавното обвинителство, во ваков случај треба да реагира Советот на јавни обвинители и да назначи вршител на должноста. Тоа би значело дека замена на Јанева би бил некој од обвинителите.
Претседателот на Советот на јавни обвинители Коле Штеријев, пак, смета дека не може да се назначи в.д специјален обвинител без да и истече мандатот на Јанева.
Штеријев треба да закаже седница на која ќе започне постапката за разрешување на Јанева од прв човек на СЈО.
Законот за СЈО во член 18 вели дека јавниот обвинител може да се разрешува од функцијата пред истекот на мандатот поради незаконито, нестручно и несовесно вршење на функцијата.
Доколку Советот на јавни обвинители започне постапка за разрешување на јавниот обвинител, во разумен рок треба да достави до Парламентот извештај за утврдената фактичка состојба и основите за разрешување.
Извештајот би бил достапен на јавноста преку комисиите во Собранието, освен ако некоја од комисиите не го одложи или спречи објавувањето на дел и на целиот извештај, доколку најде за потребно да се заштитат правата на секое лице наведено во извештајот или да спречи недозволено влијание во кое било кривично гонење.
Врз основа на доставениот извештај, а на предлог на собраниската Комисија за прашања на изборите и именувањата и по претходна согласност на четирите политички партии со најголем број на пратеници, Советот по предлог на Собранието го разрешува јавниот обвинител.
Собранието го утврдува предлогот за разрешување на јавниот обвинител до Советот на јавни обвинители со двотретинско мнозинство, вклучувајќи и мнозинство од гласовите на пратениците кои припаѓаат на заедниците кои не се мнозинство.
Согласно член 19 од овој закон, разрешениот јавен обвинител кој раководи со Јавното обвинителство може да поднесе тужба до Основниот суд Скопје 2-Скопје за разгледување на одлуката за разрешување.
Со одлука на судот, јавниот обвинител може да биде вратен на работа или да добие друг вид надоместок.
