За само еден месец, во јули оваа година, во Хрватска биле одобрени 16.517 работни дозволи за странски работници, покажуваат податоците на хрватското Министерство за внатрешни работи, според кои од почетокот на годината до 31 јули се издадени вкупно 108.116 дозволи за престој и работа за државјани на трети земји.
Министерството на својата веб-страница наведува дека од вкупниот број издадени дозволи за престој и работа, 69.809 се издадени за нови вработувања, 21.722 се за продолжување, а 16.585 се за сезонски работници.
Така, дозвола за работа во Хрватска на крајот на минатиот месец имале речиси ист број странци колку што, според пописот на населението од 2021 година, Риека имала население.
Бидејќи бројот на жителите на Риека во меѓувреме продолжи да паѓа, веројатно е дека во Хрватска, само Загреб и Сплит моментално имаат повеќе жители отколку што државата има издадено дозволи за странски работници, во што не се вклучени државјаните на членките на Европската унија, и на Исланд, Швајцарија, Норвешка и Велика Британија. Такви во Хрватска има околу осум илјади.
Најмногу странски работници дозволи добиле за работа во градежништвото, дури 39.146, што значи дека на оваа гранка отпаѓаат 36 отсто од работните дозволи.
Уште 37.022 работни дозволи издадени се во туризмот и угостителството. На градежништвото и туризмот отпаѓаат 70 отсто од издадените дозволи за странски работници.
Далеку зад тие две гранки кои „голтаат“ најмногу странски работници е индустријата, бидејќи работодавачите во таа дејност добиле 13.260 работни дозволи.
Според податоците на Хрватскиот завод за пензиско осигурување, во јули во градежната индустрија имало 135.478 осигуреници, па ако сите странски работници кои добиле дозволи навистина биле вработени во таа дејност, тоа значи дека 29 отсто од осигурениците во градежништвото се странци.
Нешто помал делот во угостителството и туризмот, затоа што бројот на издадени дозволи за оваа дејност достигнува 27 отсто од осигурениците во дејноста сместување и подготовка и послужување храна.
Веќе неколку години е јасно дека градежништвото и туризмот, чии удели во БДП се зголемуваат, не можат да организираат работење без странци, а како што одминува времето нивната улога станува сè подоминантна.
Хрватска, исто така, станува зависна од странски работници од Азија.
Втора година по ред, трети по бројност странски работници во Хрватска се Непалците, веднаш после работниците кои доаѓаат од Босна и Херцеговина и Србија.
На крајот на јули, работни дозволи во Хрватска имале 13.325 Непалци, што значи дека за еден месец бројот на работни дозволи за работниците од Непал се зголемил за 1.800.
Има 8.242 работници од Индија, 6.036 од Филипините и 4.628 од Бангладеш.
Од почетокот на годинава до крајот на јули се издадени 32.231 работна дозвола за работниците од тие четири азиски земји, што е околу 30 отсто од сите работни дозволи за странци во Хрватска.
Сепак, и понатаму најголемиот дел од странските работници доаѓаат од земјите создадени со распадот на поранешна Југославија.
Така, вкупниот број на работни дозволи издадени за државјани на Босна и Херцеговина, Србија, Македонија и Косово изнесува 59.454, или 55 отсто од сите издадени дозволи.
Но, факт е дека структурата на странските работници се менува и дека уделот на оние кои доаѓаат од соседните земји се намалува, додека уделот на работниците од азиските земји се зголемува.
Бидејќи странските работници во последните децении најмногу доаѓаа од соседните земји, најмногу од Босна и Херцеговина, Хрватска немаше голема потреба да ја осмисли нивната интеграција, бидејќи таа се случуваше без посебни мерки.
Но, со оглед на бројот на работници од Азија, чија бројка за седум месеци од од оваа година е трипати поголема од бројот на жителите на Опатија или на Цриквеница, државата, според синдикалните организации, не би смеела да стои со скрстени раце и да гледа како во „трите Опатии“ се одвива паралелен живот со минимален контакт со остатокот од Хрватска, посебно што бројот на тие работници само ќе се зголемува.
