Со надпартиски договор за прашањата од државен интерес ВМРО-ДПМНЕ предлага излез од политичката криза. Во серијата чекори насловени како ПАТОКАЗ партијата нуди решенија за актуелната но и насоки за потенцијалните идни политички кризи.
„Надпартиски договор за секое идно принципиелно решавање на внатрешни разлики, во рамки на институциите на државата, без странски агенди или претставници, единствено од страна на легитимно избрани претставници на Македонските граѓани, внатрешно обединување против вмешување во внатрешните работи на Република Македонија, од страна на странски политичари или држави кои се косат со концептот на почитување на суверенитетот или се спротивни на добрососедско однесување, заедничко отфрлање на планови, платформи или агенди кои се надвор од нашето уставно уредување или се спротивни на македонските стратегиски- државни интереси и осуда на секој директен или индиректен ревизионизам на Охридскиот рамковен договор, кој е целосно вграден во нашето уставно уредување“, посочи на прес-конференција Антонио Милошоски.
Пред усвојувањето на овие заклучоци партијата смета дека сите политички партии треба транспарентно да ги објават своите позиции за неколку клучни политички теми.
Од ВМРО-ДПМНЕ велат дека треба да се обелодени и тоа дали партиите поддржуваат вмешување на странски агенди, дали партиите се за задржување на мултинационалниот карактер на државата наспроти бинационалниот и дали за сите политички актери приоритет е стабилизирање на државата наспроти редефинирањето на односите меѓу етничките заедници.
