Големиот пожар на Галичица изминативе десетина дена зафати над 6.500 хектари површина во Македонија и Албанија. Огнената стихија и понатаму е активна. Гори на исток во правец на селата Лескоец и Стење, општина Ресен, додека на охридска територија на запад кон месноста Војтино. Зафатена е нискостеблеста вегетација и букова шума.
Покрај екипите за справување со кризи, на терен се и бројни доброволци во земјата кои речиси две недели се борат со пламените јазици, коишто предизвикаа огромна материјална и еколошка штета.
Првите денови гореа површини кои беа највисоко, на кои имаше трева, жбунови и останати нискостеблени растенија кои виреат на повисоките места и врвовите на планината Галичица. Потоа огнот зафати делови на кои има шума.
„Во моментов, околу 60 отсто од површината зафатена од огнот се тревни површини, а околу 40 отсто се површини со шума со најразлични дрвни видови. Отежнителна околност во справувањето со пожарот беше тоа што на местата каде што е пожарот има неексплодирано старо оружје и експлозивни материи кои оневозможуваат негово гаснење“, информира заменик-директорот на ЈП Национални шуми, Кире Михаилов.
Поради пожарите во опасност се ендемското тревесто растение коешто го има само на Галичица и гнездата на колониите на жолтоклуните галки во строго заштитената зона на Националниот парк „Галичица“.
„Штетите од овој пожар ќе бидат огромни, заради што за сите докажани пиромани казните треба да бидат драконски“, посочува Михаилов.
Од почетокот на август изгаснати се 370 пожари. Последен ден без ниту еден активен пожар на територијата на државата е 8 јули.
Во текот на вчерашниот ден имаше вкупно 53 пожари на отворен простор, од кои во моментов 12 се активни, 6 се под контрола и 35 се изгаснати.
Во справувањето со пожарите повторно е вклучена и Армијата, а активиран е ЕУ-механизмот за помош, со што во земјата беа испратени пожарникари и опрема од повеќе земји.
Од 15 јули годинава на сила е целосна забрана за движење во шумите од 6 до 20 часот. Забраната ќе трае се до проценката дека ризикот од шумски пожари е намален.
За непочитување на забраната, на физички лица кои ќе бидат затекнати ќе им се изрече казна од 1.500 до 2.000 евра.
(Извор: Дојче Веле / Фото: Петр Стојановски)
