Дополнителни субвенции од шест денари за килограм праски што ќе бидат откупени од преработувачките капацитети меѓу 12 и 13 јуни, е мерката со која Министерството за земјоделство, шумарство и водостопанство им излезе во пресрет на овоштарите.
Според министерот Љупчо Николовски, опфатени ќе бидат над 500 происводители, односно ќе бидат откупени околу 400 тони праски кои едвај би достигнале пет денари по килограм.
Како што изјави Николовски, новата мерка е донесена по анализата на производството и согледувањето на состојбата на терен.
„Од разговорите со производителите и од анализите кои ги направивме може да се забележи дека сегашниот род е со многу лош квалитет поради неажурноста на институциите пред се на неспособноста на водостопанското претпријатие навреме да го отстрани дефектот во тој регион и да обезбеди доволно вода за наводнување“, истакна Николовски, кој денеска ќе ги посети и ќе разговара со земјоделците во Росоман.
Реакцијата на МЗШВ следуваше веднаш откако вчера околу 50 овоштари со 10 трактори го блокираа патот Росоман-Прилеп кај пазарот во Росоман, изразувајќи револт поради слабиот пласман на праските и немањето извоз.
Земјоделците најавија радикализирање на протестот ако проблемот не се реши, а размислуваат и за исфрлање на праски пред Владата. Се заканија дека ќе ги исечат прасковите дрвца од што штета ќе има и државата и воедно укажаа на непотврдени информации за наводен увоз од Албанија и Грција.
„Целта на праските е рекордно ниска, само гајба чини 25 денари, мора да се бараат алтернативни пазари и нтервентни да се реши кризата зашто во прашање е доведен опстанокот на општината“, изјави градоначалникот на Росоман, Стојанче Лазов.
Како што истакна, пак, претседателот на Здружението на овоштари „Росоманска долина“, Игор Милошевиќ, критериумите за извоз на рускиот пазар се изострени поради што, извоз речиси нема.
