Државната изборна комисија денеска донесе заклучок за завршување на парламентарните избори. На седницата беа прогласени за конечни резултатите од изборите во Шестата Изборна единица откако Управниот суд ноќеска ја отфрли тужбата на Европскиот фронт за прегласување на едно избирачко место во село Ларце, Желино.
Претседателот на ДИК, Александар Даштевски, соопшти дека во „шестката“ Коалицијата Европски фронт има осум мандати, Влен исто така осум, Коалицијата Твоја Македонија има три, а Коалицијата за Европска иднина еден.
На седницата беше соопштено дека Аднан Азизи од Влен ќе биде пратеник на местото на тетовскиот градоначалник, Билал Касами, чиј мандат не беше верификуван на Конститутивната седница откако тој го побара тоа.
