Деветчленото семејство Салиу од село Бачишта, Кичевско, живеело во една стара трошна куќа изградена со кал и прачки, со два кревета, без кујна и тоалет, па кога за ова дознал печалбарот кичевец од село Зајас, кој живее и работи во САД, тој од свој џеб му изгради нова куќа на социјално загрозеното семејство Салиу, односно донирал 12.000 долари.
За да се докомплетира новоизградената куќа помогнале и неколку други кичевски бизнисмени. Донаторот инсистира да не му се објави неговото име.
„Јас оваа донација ја давам од хумани причини, а не за афирмација. Ќе бидам среќен ако и тоа семејство барем за момент се чувствува среќно, изјавил донаторот.
Семејството Салиу од кичевското село Бачишта изразува благодарност до хуманиот човек, но и до сите други хумани луѓе кои помогнаа тие да се преселат во новата куќа.
Иницијативата за да му се помогне на ова семејство потекна од група интелектуалци од овој регион на Кичево, кои знаеле за тешкотиите со кои се соочувало и решиле да побараат помош.
