Пивара Скопје креираше нова дигиталната платформа која ќе им овозможи на дополнителен број млади невработени лица, особено на оние што живеат во надвор од Скопје, по електронски пат, да ја поминат бесплатната обука од програмата „ Вештини за успех“ и на таков начин да стекнат знаење и вештини кои ќе им помогнат полесно да ги надминат пречките при вработување или за почнување сопствен бизнис .
Во првите две години од реализација на оваа програма, која досега се одвиваше само во просториите на Едукативниот центар на Пивара Скопје, обуката ја поминаа близу 1200 млади, од кои 71% се од женски пол. Со можностите што ги нуди дигиталната платформа, се очекува бројот на првично планираните 5600 лица кои би биле опфатени во програмата, да се достигне многу брзо, со што до крајот на 2020-та година би можел да биде и двојно поголем.
„Исклучително сме задоволни од досегашните работи од реализацијата на нашата програма „ Вештини за успех“. Тие покажуваат дека 36% од младите кои веќе ја поминаа обуката веќе успеаја да се вработат.Ваквиот резултат, заедно со големиот интерес што секојдневно го добиваме од голем број млади лица кои сакаат да земат учество во програмата, дополнително не охрабрува да продолжиме заедно со напите партнери, да вложуваме во развојот на младите. На овој начин веруваме дека ќе креираме дополнителни можности и перспективи за младите и ќе придонесеме за натамошно зголемување на вработувањето и развојот на претприемаштвото во земјата“ истакна генералниот директор на Пивара Скопје, Владимир Косијер.
Реализацијата на оваа програма на Пивара Скопје се одвива во соработка со Државната агенција за вработување која нуди постојана поддршка, особено во одредување на кандидатите на кои најмногу им се потребни ваков вид обуки, при што предност имаат младите од социјално ранливите категории.
„Сите економски параметри и релевантни прогнози укажуваат на тоа дека оваа година ќе ја завршиме со рекордно низок процент на вкупна невработеност во земјата. Но, и покрај тоа останува предизвикот да работиме на намалување на невработеноста кај младите која се уште е на високо ниво. Реализацијата на ваквите обуки, кои овозможуваат и учење на далечина, преку дигитална платформа, се компатибилни, со стратегијата и мерките на Владата за натамошно намалување на невработеноста, особено кај младите. Досегашните резултати што се постигнати со оваа програма се исклучително значајни и заслужуваат почит и поддршка од целата заедница“, изјави, министерката за труд и социјална политика, Мила Царовска
Преку новата дигитална платформа, исто како и со обуките што се реализираат во просториите на Едукативниот центар на Пивара скопје, младите добиваат можности да ги усовршат своите комуникациски вештини, да стекнат знаење од областа на финансиите и деловното работење, за креирање на развојните планови и управување со проекти, за ефикасно водење преговори и продажба, како и за организацијаи ефективно управување со времето и ресурсите.
„Целокупната обука која преку новата дигитална платформа станува достапна за уште поголем број млади луѓе, содржи голем обем на практично знаење и искуства од клучните области на деловното работење. Тоа знаење и искуство на младите им го пренесуваат членовите на менџерскиот тим на Пивара Скопје и други водечки претставници од бизнисот, експерти од академската заедница, од јавните институции, како и од реномираните меѓународни организации, кои учествуваат во реализација на програмата, што секако е уникатна вредност за учесниците во обуките“ вели Зоран Костовски од компанијата за деловна едукација „Мотива“, која е партнер на Пивара Скопје, во реализација на овој проект.
Инаку, програмата „Вештини за успех“ е само еден сегмент од активностите на Едукативниот центар на Пивара Скопје кој функционира уште од 1997-ма година. За досега остварените резултати, на полето на деловната едукацијаи својот општествен придонес, Едукативниот центар на Пивара Скопје има добиено повеќе признанија меѓу кои и „Националната награда за општествено одговорни практики“ во категоријата „Вложување во заедницата“. Центарот е член на Европскиот совет за деловна едукација со седиште во Женева, Швајцарија.
Повеќе информации на www.polnacasa.mk
