Јавното обвинителство го повлече обвинението за сите обвинети во предметот „Претседавач“, којшто првенствено се врзуваше со името на поранешниот претседател на Советот на Општина Центар, Мирослав Шиповиќ.
Повлекувањето на обвинението се случи при самиот крај на судскиот процес, во завршни зборови на обвинителството.
Обвинението за овој случај беше подигнато во 2013 година. Предметот за случајот „Претседавач“ опфаќа 12 лица: поранешни членови на Управниот одбор на АД „Машинопромет“, вработени во УЈП, сопственици на приватни фирми. Сите се товарат за злоупотреба на службена должност.
Според Обвинителството, обвинетите прибавиле значителна корист за друг и нанеле штета на „Машинопромет“ на начин што иако знаеле дека се водат повеќе постапки за присилна наплата на даночен долг од Друштвото, како и дека од Основен суд Скопје 2 биле донесени повеќе решенија за забрана за располагање со имотот на „Машинопромет“, го обезвредниле и оттуѓиле движниот имот во вредност од 64.281.043,00 денари, а на име на даночен долг нанеле штета во износ 17.000.003,00 денари.
