Исмаил Ханија, шефот на Хамас, пристигна денеска во Каиро, објави палестинската исламистичка организација, а информиран извор потврди за Ројтерс дека во тек се интензивни преговори за размена на заложници за палестински затвореници меѓу Израел и Хамас, со посредство на Катар и Египет.
Според медиумите, Израел понудил прекин на огнот во Газа на најмалку една недела како дел од преговорите за пуштање на слобода на дополнителни заложници од енклавата, потсетува ДПА.
Ханија, кој живее во Катар, пристигна „во египетската престолнина на разговори со египетските власти за развојот на ционистичката агресија во Појасот Газа и многубројни други прашања“, се наведува во соопштението кое го цитира агенцијата АФП.
И Хамас и Израел дадоа повеќе сигнали за можноста да се постигне прекин на огнот во борбите во Газа.
Вчера, израелскиот претседател Исак Херцог ја навести можноста за нова хуманитарна пауза во Газа за да се олесни натамошното ослободување на заложниците.
„Израел е подготвен за нова хуманитарна пауза и дополнителна хуманитарна помош за да се олесни ослободувањето на заложниците“, им рекол тој на дипломатите, според портпаролот.
Онлајн порталот „Аксиос“ во вторникот објави, наведувајќи две израелски официјални лица и еден „добро упатен извор“, дека Израел очекува Хамас за возврат да ослободи повеќе од триесет заложници.
Предлогот на Израел за најмалку еднонеделно примирје во замена за пуштање на околу 40 заложници бил пренесен преку посредник на Катар, пишува „Аксиос“.
Останатите жени, мажи над 60 години и други заложници кои се уште се во Газа, а се болни или тешко ранети и потребна им е итна медицинска помош ќе бидат ослободени, објави порталот.
Станува збор за прв предлог на Тел Авив откако еднонеделниот договор за прекин на огнот истече минатиот месец, информира Аксиос.
За време на тоа примирје беа пуштени 105 заложници, а Израел за возврат ослободи 240 Палестинци од своите затвори.
Медиумите во понеделникот објавија дека Дејвид Барнеа, шеф на израелската разузнавачка служба Мосад, во Варшава ги информирал директорот на ЦИА, Вилијам Барнс, и катарскиот премиер, Абдулрахман Ал Тани, за новите преговори со Хамас.
Хамас, организација која Израел, Соединетите Американски Држави и неколку други земји ја сметаат за терористичка, претходно објави дека не сака да преговара доколку Израел не ги прекине своите воени операции.
Според израелските проценки, најмалку 109 заложници се уште се во Појасот Газа.
(Фото: АФП)
