ВМРО-ДПМНЕ, најбогатата партија во Европа која не плаќа данок, продолжува да шири лажни вести преку бесмислени математики, велат од СДСМ во соопштение.
На официјалната веб страница на Министерството за финансии транспарентно се објавени сите информации поврзани со денешната аукција на домашниот пазар на хартии од вредност, но и за нивото и висината на јавниот долг.
Доколку Лилјана Кузмановска го прочитала денешното соопштение објавено од Министерството за финансии, наместо да шири лажни вести ќе знаеше дека утре, Владата на Република Македонија и Министерството за финансии ќе вратат 57.79 милиони евра долг што го наследиле граѓаните токму од претходната влада предводена од ВМРО-ДПМНЕ, додека останатите средства ќе бидат искористени за активности предвидени во Буџетот, во интерес на граѓаните.
Задолжувањата на домашниот пазар се одвиваат со намалена зачестеност, по поволни услови и транспарентно, што не беше случај претходно.
Разликата е очигледна. Додека ВМРО-ДПМНЕ парите од буџетот ги трошеше за криминални зделки и тендери за богатење на Никола Груевски и фамилијата, Владата предводена од СДСМ одговорно и транспарентно раководи со јавните финансии и повеќе пари од буџетот насочува за потребите на граѓаните и за развој на стопанството!
