Советниците во Советот на општина Делчево од ВМРО – ДПМНЕ донесоа одлука да се откажат од советничкиот паушал за март и да го донираат во борбата против вирусот КОВИД-19.
Средствата од паушалот, како што информираше координаторот на советничката група Сашко Ивановски, ќе бидат донирани во здравството, социјалата, образованието, односно онаму каде советниците ќе проценат дека се најпотребни.
„Како координатор на Советничката група на ВМРО – ДПМНЕ и коалицијата, од името на советниците Билјана Ѓоргиевска, Кристи Стојковски, Славица Димитрова и Ванчо Велинов во Советот на општина Делчево, а потоа и како татко на две деца, како наставник, долгогодишен активист, а пред се како човек, сакам да соопштам дека имајки ја предвид тешката ситуација предизвикана од вирусот КОВИД19, Советничката група на ВМРО – ДПМНЕ, консензуално одлучи паушалите за март да ги донира во борбата против оваа опака болест, со цел да ги ублажи последиците од неа“, информира Ивановски.
Апелираше и ги повика сите други членови советници да ја поддржат оваа хумана иницијатива.
„Воедно предлагам, доколку борбата со оваа опака болест продолжи, сите безусловно да се откажеме од паушалите до крајот на борбата. Тоа е најмалку што можеме да направиме за нашите сограѓани, бидејки мандатот и довербата ни е даден од нив и имаме морална, граѓанска, а пред се човечка должност да се бориме, бидејки на тоа и се заколнавме на почетокот на мандатот“, додаде Ивановски.
Од советничката група на ВМРО – ДПМНЕ упатија поддршка до здравствените работници, полицијата, војската, вработените во маркетите, возачите и сите оние кои се во првите редови во борбата против коронавирусот.
