Каталонскиот претседател Карлос Пуиџдемон денеска вети дека ќе продолжи на патот кон одржување на референдумот за независност за кој официјален Мадрид смета дека би бил илегален и повика на масовни демонстрации следната недела во знак на поддршка за отцепување на Каталонија од Шпанија.
„Цела државна сила е против нас. Соочени сме со правни процедури и закани… Регионалната влада е поодлучна од кога и да е да одржи плебисцит кој е планиран за 1 октомври“, изјавил Пуиџдемон на состанокот на официјалните лица од двете страни во Барселона.
Тој, како што се наведува, како некој кој долго се залага за независност на регионот на североистокот на Шпанија, се надева дека ќе успее да ги мобилизира приврзаниците во демонстрација на легитимитетот како одговор на заканите на Мадрид дека ќе го спречи референдумот на кој било начин.
„Во понеделник ќе ги наполниме улиците мирно и демократски, како и секогаш“, дециден бил тој.
Како што наведуваат медиумите, анкетите покажувале дека Каталонците се подеднакво поделени по прашањето за независност, но дека преку 70 отсто од нив сакаат да се одржи референдумот за да се реши тоа прашање, слично како што беше решено, исто така со референдум, во Шкотска во 2014 година.
Каталонската влада одржа симболичен референдум во 2014 година, кога повеќе од 80 отсто од учесниците гласаа за отцепување од Шпанија, иако само 2,3 од 5,4 милиони Каталонци кои имале право на глас, учествуваа на гласањето.
Франс прес претходно информираше дека шпанскиот премиер Маријано Рахој изјавил дека владата на таа држава побарала од Уставниот суд да го суспендира барањето на лидерот на Каталонија за одржување на референдум за независност на 1 октомври, нарекувајќи го таквото барање „неприфатлив чин на непослушност“.
Рахој рекол дека сите општини во Каталонија ќе бидат предупредени за својата „обврска да ги спречат или блокираат“ напорите да дојде до реализација на референдумот кој е, како што вели, неуставен.
Тој на седница на каталонскиот парламент, кој со усвојувањето на законот ги официјализираше своите планови во шпанскиот регион да се организира референдумот за независност, настанот го нарече „политичка перверзија“ на каталонската влада, пренесе агенцијата АП.
„Референдумот е незаконски и претставува напад на институционалниот поредок на Шпанија и Каталонија“, изјавил Рахој после итниот состанок со членовите на својот кабинет.
„Тоа е нешто што владата и судовите неможат да го дозволат“, изјави Рахој, ветувајќи дека референдумот нема да се случи.
Шпанското Државно обвинителство соопшти претходно дека ќе подигне обвиненија против членови на каталонскиот парламент поради изгласување на закон за одржување на референдумот на 1 октомври, кој шпанската влада го смета за нелегален.
Повеќето пратеници во каталонскиот парламент, во кој мнозинството го имаат партиите кои се залагаат за отцепување од Шпанија, гласаа за закон за референдум и за правна рамка неопходна за воспоставување на независна држава, јави Ројтерс.
Законот е усвоен со мнозинство од 72 гласа, наспроти 11 воздржани. Пратениците кои се противат на отцепувањето на каталонија, ја напуштија седницата пред гласањето, наведува АФП.
