„Американскиот претседател Доналд Трамп во својот говор по повод Денот на независноста најави победа против „радикалната левица“ и истакна дека земјата напредува во борбата против коронавирусот, во време кога во земјата има рекордно зголемување на бројот на нови случаи“, пренесоа светските медиуми.
На церемонијата пред Белата куќа, на која присуствуваа членови на војската и медицинските лица од првата линија на борбата со заразата, Трамп кажа дека 99 проценти од случаите со коронавирус во САД се „целосно безопасни“.
„Тој повтори дека Кина мора да „сноси целосна одговорност“ затоа што не го спречи ширењето на вирусот“, пренесува Би-Би-Си.
Американскиот претседател изрази уверување дека САД ќе имаат решение во форма на терапија или вакцина „далеку пред крајот на годината“.
Во говорот Трамп ја осуди намерата на демонстрантите да ги отстранат
спомениците на историските личности, како „обид за уништување на САД“ и ги повтори обвинувањата против „радикалната левица“.
„Ние сме на пат да ја победиме радикалната левица, анархистите, агитаторите, крадците и луѓето кои во многу случаи немаат апсолутно никаква идеја што прават. Никогаш нема да и дозволиме на лутата банда да ги урне нашите статуи, да ја избрише нашата историја и да ги поучува нашите деца“, рече Трамп.
Американскиот претседател вети дека ќе го заштити и зачува американскиот начин на живот, што почнал во 1492 година, кога Коломбо ја открил Америка.
„Отсекогаш имало такви кои лажеле за минатото за да добијат моќ во сегашноста, оние што лажат за нашата историја, кои сакаат да се срамат од тоа што сме“, рече Трамп и додаде дека нивната цел е уништување.
Тој испрати слична порака и за време на прославата на Денот на независноста, во петокот вечерта, во Маунт Рашмор, во Јужна Дакота, на која и се спротивставија домородните Американци кои веруваат дека дел од земјата им е украдена пред повеќе од еден век.
И покрај тоа што официјалните претставници повикаа Американците низ целата земја да го избегнат метежот за славење на празникот, Трамп во вашонгтон организираше голема прослава „Поздрав за Америка“, на која имаше и прелети на воени авиони и огромен огномет.
