Претседателот на Соединетите Американски Држави, Доналд Трамп, му вети на папата Фрањо после средбата во Ватикан дека никогаш нема да го заборави тоа што тој му го кажал.
Како што пренесува Ројтерс, делувало дека на Трамп му било непријатно додека влегувал во малиот лифт кој го одвезол на третиот кат во Апостолската палата.
Трамп и папата разговарале околу половина час, пренесе АП, зад затворени врати, а по средбата, како што наведува новинската агенција, двајцата си размениле подароци.
Папата Фрањо на американскиот претседател му ги подарил своите три главни учења, кои главно ги подарува на сите шефови на држави кои го посетуваат, и скулптура на маслиново дрво кое симболизира мир.
Трамп делувал многу опуштено после средбата и со насмевка на лицето рекол дека мир на сите би ни бил од корист, пренесува Ројтерс.
Тој на папата на подарок му дал книги од Мартин Лутер Кинг и му рекол дека се надева дека ќе ужава во нив.
Одделни главни теми кои се содржани во тие учења се дијаметрално спротивни на политиката на Трамп и ветувањата дадени во текот на предизборната кампања, посебно на полето на заштитата на животната средина и нееднаквоста во приходите.
Во Ватикан, во посета на папата Фрањо, покрај Трамп беа и првата дама на САД, Меланија Трамп, ќерката и зетот на претседателот, Иванка и Џаред Кушнер, инаку советник во Белата куќа за трговија и Блискиот исток, потоа американскиот советник за национална безбедност Херберт Рејмонд Мекмастер, советничката Хоп Хикс и помошникот Ден Скавино.
