„Работевме и постигнавме многу во насока на менување на перцепцијата на граѓаните за законодавниот дом. Потврда за тоа е и последниот извештај на Европската комисија, во делот за Собрание каде се нотира дека е постигнат напредок во спроведувањето на Стратешкиот план 2018 -2022“, истакна претседателот на Собранието Талат Џафери на е-конференцијата за Отворен парламент, Акциски план за Партнерство за отворена власт 2012-2023.
Во своето обраќање, Џафери нагласи дека и во актуелната ситуација со Ковид -19, Собранието како институција се обидува да биде транспарентно и работи на нова веб страница за да се овозможи подобар проток на информации до граѓаните.
„За жал, реалноста која ја живее денес цел свет, е наметнатата реалност од КОВИД-19 и глобалната закана по здравствените и економските столбови на секоја држава, без исклучоци, и тоа претставува огромен предизвик за задржување на овој дискурс со ориентирање кон виртуелно одржување на активностите а сепак квалитетна и ефикасна примена на уставната надлежност на законодавната власт. Заедно работиме на нова собраниска веб страница, ново собраниско студио, со цел да се овозможи подобар проток на информации за граѓаните, следствено и нивно поголемо учество во собраниските активности, во законодавниот процес“, нагласи Џафери.
Додаде дека за Собранието од исклучителна ваност се и измените во Законот за Собрание со кои ќе се зајакне независноста на човечките ресурси.
„Во таа насока е и изготвената функционална анализа, со цел ефективно и максимално добро искористување на постојните капацитети, со цел подобрување на функционалноста на институцијата. Со сите свои активности во насока на достапност за граѓаните преку најразлични модули и форми за нивно вклучување во работата на
Собранието, успеавме да станеме поблиски, поотворени, подостапни и транспарентни во нашето работење“, рече Џафери.
Потенцира дека остануваат посветени на Партнерството за отворена власт и оти во таа насока го започнуваат процесот за подготовка на новиот план 2021-2023.
Денешната виртуелна конференција за Отворен Парламент, Акциски план за Партнерство за отворена власт 2021-2023, се организира во рамки на Глобалната недела на отвореност на законодавството организирана од Е-мрежата за Отворен парламент.
