Ниту ова лето, како ни многуте претходни, не се покажа како исклучок од правилото кога е европскиот фудбал во прашање.
Англиските клубови трошеа пари на засилувања како „луди“, ден пред почетокот на Премиер лигата сметката на островјаните е 1,24 милијарди евра. И тука не е крајот, со оглед на тоа дека до крајот на преодниот рок на 31 август остана уште доста време.
А, според она што го пишуваат медиумите на Стариот континент, се „крчкаат“ уште некои „бомби“, кои би можеле дополнително да го зголемат вкупниот биланс. Некои гледаа да ја засилат одбраната, други нападот, некои во секоја линија од тимот додадоа скапа карика, за која веруваат дека ќе им помогне да ги постигнат своите цели. Со тоа што тие не се исти за сите.
Така Ливерпул и Манчестер Сити, тандем кој веќе неколку години води трка за титулата, веднаш доведоа по еден шпиц играч. Сагата околу трансферот на Ерлинг Холанд заврши оној ден кога шампионот го објави на социјалните мрежи потписот на момчето чиј татко, исто така, го носеше дресот на „граѓаните“, вреден 60 милиони евра.
Симболично, во ист ден таткото и синот ставија параф на договор со Сити, разликата е во само 20 години.
По Норвежанецот, Гвардиола сакаше замена за Фернандињо во средниот ред и го доби во форма на англискиот репрезентативец Келвин Филипс, кој пристигна од Лидс за нешто помалку од 48 милиони.
Ниту Ливерпул не се штедеше при изборот на нов центарфор. Јирген Клоп, тренерот на „црвените“, го впери прстот кон Дарвин Нуњез и како дете во продавница брзо доби „нова играчка“ вредна 73 милиони евра.
Сепак, титулата за најголем расипник барем засега оди кај Арсенал кој на засилувања потроши 132 милиони евра. Тандемот на Сити што го донесоа, Габриел Жесус (52 милиони) и Олександар Зинченко (35) го сочинуваат најголемиот дел од сметката на „топчиите“.
Зад нив е градскиот ривал Челзи, кој исто така ги ослабе „граѓаните“ со трансферот на Рахим Стерлинг (56), додека одбраната се засили со доаѓањето на Калиду Кулибали од Наполи (38). Иако, „сините“ нема да застанат тука, планот е да доведат уште еден стопер и уште еден дефанзивец, па сосема е извесно дека двократниот европски шампион до крајот на август ќе ја зацементира лидерската позиција на листата на најголеми англиски трошачи.
Меѓу екипите кои надминаа сто милиони потрошени за трансфери се вбројуваат Лидс и Тотенхем. Челниците на „петлите“ на Антонио Конте му ветија конкурентен тим, па оттука и 58-те милиони потрошени за Ришарлисон од Евертон. Неочекувано „скржав“ засега е Манчестер Јунајтед, кој даде најмногу за стоперот на Ајакс, Лисандро Мартинез (57), иако на другата страна на медалјата е фактот што некои играчи како Френк де Јонг експресно ги одбија „ѓаволите“ поради неиграње во Лигата на шампиони. Платежната моќ ја покажа и новајлијата и повратникот во елитата, Нотингем Форест, кој за играчи издвои 94,75 милиони евра.
На другата страна од оваа приказна се Брајтон (19,6) и Борнмут (11,9), кои не потрошија ниту 20 милиони на засилувања, додека Евертон и Лестер очигледно најдоа змии во паричниците, бидејќи од тие две екипи ниту еден евроцент не е даден за новите играчи.
ВО ПЛУС САМО ТРИ ЕКИПИ
Од 20 екипи во Премиер лигата, само три можат да се пофалат дека бизнисот им е позитивен ова лето. Тоа се Манчестер Сити, кој иако важи за расипник, летово продаде играчи и се ослободи од „товарот“ на платниот список (+51,5 милиони евра).
Истото важи и за Брајтон (+14,6), додека Евертон е во плус 58 милиони, бидејќи за ниту еден играч не плати отштета, а за споменатата сума го продаде Ричарлисон на Тотенхем.
