Битиќи: „Отворен Балкан“ е шанса за сите, да ја оставиме регионалната конкуренција и да се посветиме на конкурентноста

LinkSense.mk

Да ја оставиме зад нас регионалната конкуренција и да појдеме напред заедно со силната регионална конкурентност, порача вицепремиерот за економски прашања Фатмир Битиќи од денешниот панел што се одржува во рамки на самитот „Отворен Балкан“ во Охрид.

„За жал, долги години нашите земји се затворени и заклучени во политика. Денеска од тука ви велам да ги отвориме за искуства, можности, напредок, развој и конкурентност. Да ја оставиме зад нас регионалната конкуренција и да појдеме напред заедно со силната регионалната конкурентност затоа што секоја земја од Западен Балкан со својата единственост за развој и иднина е додадена вредност за нашиот регион, рече Битиќи во обраќањето.

Иницијативата „Отворен Балкан“, како што посочи, е шанса за сите генерации.

„Олицетворение на Опен Балкан сум јас – образуван во Тирана, работно искуство креирано во Западен Балкан почнувајќи од Северна Македонија, Албанија, Косово, Црна Гора, Србија, Босна, а сето тоа затоа што ми беше дадена една шанса. Но јас сум еден. Отворен Балкан е шанса за сите наши генерации, а што е помоќно од тоа да дадеме една шанса, истакна Битиќи.

Придобивките од иницијативата „Отворен Балкан“, според Битиќи, се големи. Изминатиот период компаниите од трите држави (Северна Македонија, Албанија и Србија) имаат можност да ги извезуваат своите производи без трошење на времето за административни процедури, а веќе реалност е и слободениот пазар на труд кој отвора поголеми можности за граѓаните.

„Велат ако сакаш да одиш брзо, оди сам, но ако сакаш да одиш далеку, тогаш оди заедно. А долгорочна стабилност, мир и предвидливост е она што нашите граѓани го заслужуваат, рече Битиќи меѓу другото во своето обраќање.

На самитот во Охрид, присутни се премиерите на Северна Македонија и Косово, Димитар Ковачевски и Еди Рама и српскиот претседател Александар Вучиќ. Присутни се и црногорскиот премиер Дритан Абазовиќ и претседавачот со Советот на министри на БиХ, Зоран Тегелтија, како и еврокомесарот за проширување Оливер Вархеjи.

 

МИА