Германскиот министер за здравство Карл Лаутербах ја истакна важноста од воведување на задолжителна вакцинација во борбата против пандемијата со корона вирус.
„Мораме да прифатиме дека дури и задолжителното вакцинирање никогаш нема да стигне до сите“, изјави Лаутербах за неделното издание на весникот „Велт“.
„Но, уверен сум дека постои голема група невакцинирани луѓе кои ќе се вакцинираат ако воведеме мерка“, додаде тој.
Лаутербах истакна дека се надева оти обврската за вакцинација во иднина доволно ќе го заштити населението.
„Не можеме да дојдеме во состојба едно лето да е добро, а новите варијанти да не изненадат наесен – и тоа без да го вакцинираме огромното мнозинство од населението. Затоа што тогаш сè би започнало од почеток.“
Министерот за здравство, исто така, ја нагласи нужноста од воведување задолжителна вакцинација против ковид и покрај ширењето на „омикрон“, за кој се вели дека носи помал ризик од тешки симптоми, но е повеќе пренослив од другите варијанти на вирусот.
„Инфекцијата со ‘омикрон’ не ве прави имун на следната варијанта на вирусот. Наивно е да се верува дека варијантата ‘омикрон’ е крај на пандемијата“, рече Лаутербах.
Дискусија за задолжителна вакцинација
Германија досега не ја направи вакцинацијата против корона вирусот задолжителна за ниту една варијанта. Бундестагот би требало да расправа за тоа прашање овој месец, но одлуката не се очекува во блиска иднина.
Социјалдемократите на Лаутербах, кои ја предводат владината коалиција, велат дека имаат намера да го завршат законодавниот процес до крајот на март.
Германските лидери вчера најавија дека ќе ги олеснат правилата за карантин низ целата земја, а дека ќе воведат дополнителни ограничувања за рестораните и баровите, како одговор на стравот од зголемување на бројот на случаи на корона вирусот.
Во меѓувреме, владата ја подигна зацртаната стапка на вакцинација против корона вирусот за да се постигне колективен имунитет.
„Нашата цел мора да биде да достигнеме стапка од 95 проценти, особено кај ранливите групи“, рече државната секретарка во Министерството за здравство, Сабине Дитмар, за саботното издание на весникот Аугсбургер Алгемајне.
„Првично се сметаше дека стапката од 70 проценти е доволна за да се постигне колективен имунитет. Меѓутоа, како што сега знаеме, тоа не е доволно во светлината на големиот број мутации.“
Дитмар истакна дека се потребни „повеќе вакцинации“ за да се стави крај на пандемијата.
(Фото: ЕПА)
