Германските градежници во големи проблеми

LinkSense.mk

Претставниците на градежниот сектор во Германија очекуваат значителни проблеми во наредниот период.

Следната година мораме да сметаме на значителни тешкотии во градежниот сектор како резултат на застојот од пандемијата, недостатокот на материјали и новите случувања предизвикани од војната во Украина“, рече Ханс Маер, директор на Баварската асоцијација за изградба на станови.

Според едно истражување 90 отсто од градежните изведувачи се жалат на наглото зголемување на цените на материјалите, а 80 отсто на недостиг на градежни материјали.

Многу претприемачи не се осмелуваат да склучат нови зделки поради непредвидливиот раст на цените. Со оглед на тоа што цените на објектите се договараат пред почетокот на работата, многумина, според анкетата, стравуваат од сериозни финансиски проблеми во случај на поскапување на материјалите.

Претставниците на градежната индустрија сметаат дека ветувањето на новата социјалдемократско-зелено-либерална влада за изградба на 400.000 станови годишно е „под голем знак прашалник“.

На новиот пазар на станови се разви вистинска бура, а најголем фактор е недостатокот на градежни материјали“, рече Аксел Гедешко, директор на Германското здружение за домување.

Како една од причините заради кои целта за изградба на нови станови по пристапни цени е неостварлива, според мислењето на претставниците од градежниот сектор е донесувањето на нови, построги, климатски услови за новаградбите.

Ова ја прави изградбата значително поскапа, а за изградбата да се исплати, претприемачите мора подоцна да бараат од своите станари зголемени кирии, што не е владина цел“, рече Јан-Марко Лучак, портпарол на парламентарниот клуб на опозициската ЦДУ/ЦСУ, за прашањето за изградбата на станови.

Проблемот со недостигот на материјали не ја погодува само високоградбата, туку и нискоградбата, бидејќи освен челичните елементи за армирање како и дрвото и алуминиумот, недостига и асфалт за изградба на патишта.

Во моментов се работи на промена на уредбата, која ќе им овозможи на градежните компании последователно да ја зголемат конечната цена во случај на пораст на цената на материјалите. Но, тоа би се однесувало само на договори каде што договорен орган е државата.

Проблемот со недостигот на квалификувана работна сила беше намален за време на пандемијата поради помалиот обем на работа, но состојбата може повторно да се влоши во иднина, покажуваат податоците на Германското здружение за градежништво.