Сензациите на Светското фудбалско првенство во Катар продолжија и вчера. Откако Саудиска Арабија ја шокираше Аргентина со 2:1 (0:1), со идентичен резултат Јапонија ден подоцна славеше во дуелот против Германија.
Спортските медиуми во Германија на нож го дочекаа неуспехот на националната селекција, а повеќето од нив за овој дебакл го обвинуваат селекторот Флик.
Германија со пораз ја заврши групната фаза на Светското првенство во Русија, а на ист начин продолжи и во Катар. Вкупно, ова е трет пораз во четирите последни натпревари од групните фази на Мундијалите за четирикратниот светски првак.
Илкај Гундоган ги доведе Германците во водство од пенал во 33. минута, но Јапонија подоцна направи пресврт со головите на Рицу Доан во 75. и на некогашниот напаѓач на Партизан, Такума Асана, во 83. минута за конечни 2:1.
„Билд“: „Ова не е вистина!“
„Дебакл на Германија на стартот на Мундијалот“ е наслов на текстот што весникот „Билд“ го започнува со израз на неверување: „Ова не е вистина! Бламажа на Германија на стартот на Мундијалот. Загуби со 2:1 од аутсајдерот Јапонија иако имаше водство. Дебаклот потсетува на горчливиот турнир во Русија во 2018 година, кога Германија беше елиминирана по групната фаза. Горкото сознание е дека Германија нема само проблем во нападот, туку и во одбраната, која делува разнишано. Полна е со дупки и се губат многу топки. Фудбалска Германија стравува пред натпреварот со Шпанија, во недела. По поразот од Јапонија, мечот против Шпанија ќе биде како да се игра финале“, пишува Билд.
Инаку, Шпанија само после половина час го реши прашањето на победникот против Костарика.
„Кикер“: „Кога реагираше селекторот стана уште полошо“
“И покрај водството, Германија го расипа почетокот на Светското првенство. Исто како и во 2018 година против Мексико, Германија го загуби првиот натпревар на Мундијалот. Елф не беше беспрекорен, но Јапонците во првото полувреме не се заканија. Селекторот Флик реагираше кон крајот на мечот, уфрлувајќи ги во игра Геце и Фулкруг, но тоа не само што не помогна, туку стана уште полошо. Германија сега е под притисок“, објави Кикер и потсетува дека пораз од Шпанија во второто коло би значело и збогување со Светско првенство.
„Скај Спорт“: Флик со скаменет израз на лицето
“Ханси Флик седеше на клупата со скаменет израз на лицето, неговите упатства веќе немаа ефект. Германија со покривање на устата испрати порака, но Светското првенство започна со страшен пораз, исто како и во 2018 година. Германија после голот на Гундоган остана јалова поради што сега се под неверојатен притисок.
Ако на Германија може нешто да и се приговори, освен за лошата игра во одбраната, тоа е за отсуството на втор гол и покрај супериорноста и големиот број прилики. Се докажа дека против Јапонија не смее да се биде невнимателен“, заклучува „Скај Спорт“.
„Спорт1“: „Јапонија ја посрамоти Германија!“
„Шок на Мундијалот! Јапонија ја посрамоти Германија“, гласи насловот на „Спорт1“, а во текстот се вели: „Германија го расипа почетокот на Светското првенство. Јапонија ја шокираше Германија, која долго размислуваше и повторно потфрли пред голот“.
Германија и Шпанија играат во недела од 20 часот, додека претходно, во првиот натпревар од второто коло од групата „Е“, од 11 часот, ќе се сретнат Јапонија и Костарика.
(Фото: АП)
