Забрана за летови од Велика Британија, 14-дневна самоизолација за патниците кои пристигнуваат од таа држава

– Министерството за здравство соопшти дека на Главниот координативен кризен штаб е усвоен заклучок за нови рестриктивни мерки, односно за забрана за летови од и кон Велика Британија до крајот на годинава.

Дополнително за сите граѓани кои во земјава со директни летови ќе дојдат од Велика Британија, како и за оние патниците кои од таа држава ќе стигнат во земјава по копнен пат, ќе важи мерката задолжителна 14- дневна самоизолација.

Комисијата за заразни болести мерката за самоизолација ја усвои превентивно на утринскиот состанок, по информациите дека нова мутација на коронавирусот се шири во Велика Британија и според првичните епидемиолошки анализи е позаразна, се наведува во соопштението на Министерството за здравство.

Претходно, Министерството информира дека Комисијата за заразни болести засега не ја разгледала опцијата да предложи задолжителен ПЦР тест за влез во нашата земја, односно да предложи рестриктивна мерка за влез или излез од земјава.

Министерството за здравство апелира до сите граѓани кои патуваат да ги почитуваат здравствените протоколи, како задолжително носење заштитна маска во автомобил или друго превозно средство, а превозниците да ја почитуваат мерката за бројот на патници се со цел заштита на здравјето на граѓаните.