Владина делегација предводена од премиерот Зоран Заев во чиј состав се и вицепремиерот за европски прашања Бујар Османи и шефот на дипломатијата Никола Димитров, денеска и утре учествуваат на самитот ЕУ-Западен Балкан во рамки на берлинскиот процес што се одржува во Лондон.
Централните настани на самитот започнуваат утре со приемот на премиерката на Обединетото кралство на Велика Британија и Северна Ирска, Тереза Меј за шефовите на делегациите на земјите членки на берлинскиот процес.
Премиерот Заев во текот на првиот работен ден ќе присуствува на работниот ручек за шефовите на делегациите и на директорите на европската инвестициона банка, и на претставниците на регионалниот совет за соработка на земјите од Западен Балкан.
За време на самитот планирана е и средба на Заев и владината делегација, со високата претставничка за безбедност и надворешна политика на ЕУ Федерика Могерини.
