Денес доцна попладнево патник во автобус на автопатот во јужна Германија неколку часови држеше двајца возачи како заложници, објави германската полиција додавајќи дека заложничката криза успешно е завршена и дека грабнувачот е совладан и уапсен.
Весникот „Билд“ извести дека околу 21.25 часот припадници на германската државна специјална полиција, познати како СЕК, влегле во автобусот и дека се слушнале три детонации.
„Полициски хеликоптери сега го осветлуваат целото подрачје“, додава весникот во извештајот.
Полицијата претходно објави на Твитер дека ја затворила делницата од автопатот А9 јужно од Нуремберг, во Баварија, но не ја наведе причината за тоа. После тоа соопшти дека се претпоставува дека во автобус се вооружени лица и други луѓе и дека патниците успеале да го напуштат возилото. „Билд“ во својот текст наведе дека автобусот допатувал од странство.
Српски медиуми, пак, информираат дека во случајов бил грабнат автобус на „Ласта“ од Белград и дека двајца патници се повредени.
Генералниот конзулат на Србија во Минхен вечерва, после веста за заложничката криза, стапил во контакт со германската полиција која потврдила дека било уапсено едно лице за кое се претпоставува дека е државјанин на Србија, но не можеле да дадат повеќе податоци за случајот. Во тек била проверка на државјанскиот статус на лицето, кое најнапред нападнало двајца патници, а потоа ги држело возачите како заложници.
Се се случило после 17.30 часот во автобусот кој сообраќај на меѓународната автобуска линија Дортмунд – Белград. На делот од автопатот меѓу Нирнберг и Инглостад извесен Фахрудин Кахровиќ, кој влегол во автобусот во Франкфурт, нападнал двајца патници. Патниците го напуштиле автобусот, а напаѓачот ги земал возачите како заложници. Неколку часови подоцна Кахровиќ бил совладан од припадници на германската специјална полиција.
Возачите тврдат дека Кахровиќ рекол оти добил порака од Алах да ги нападне патниците или во спротивно тој ќе бил нападнат. Истрагата за случајов е во тек.
Заради состојбата полицијата повеќе часови, во двата правци, затвори дел од автопатот А9.
(Фото: Билд)
