Бурата „Сиаран“, која во четвртокот ја погоди Западна Европа, однесе најмалку шест животи, вклучително и петгодишно дете во Белгија, и направи сообраќаен хаос – затворање на пристаништата и одложување на бројни летови.
Паѓањето на дрвја предизвикано од силните налети на ветерот ја предизвика смртта на сите шест лица: две во Белгија и по едно во Шпанија, Франција, Германија и Холандија.
Поради невремето делумно е во прекин и железничкиот сообраќај во Фландрија, а возовите во Белгија кои сообраќале возеле со намалена брзина.
Поморскиот сообраќај беше во прекин во Антверпен, а следеше сообраќаен хаос на бриселскиот аеродром, со одложени летови и долги доцнења.
Покрај еден загинат, на северот на Франција во бурата повредени се 16 лица, меѓу кои седум пожарникари. Во Франција без струја останаа околу 1,2 милиони домаќинства, најмногу во Бретања – 780.000.
Невремето тешко го погоди и југот на Англија, заради што беа откажани бродските и траектните линии од Довер. Затворени се и околу стотина училишта. На островот Џерси е издадено црвено предупредување поради ветрови што дувале со брзина од 160 километри на час. Откажани се сите летови од аеродромите Џерси, Гернзи и Орињи.
Во Холандија на сила е портокалово предупредување, поради ветрови кои достигнуваат брзина од над 110 километри на час.
На амстердамскиот аеродром Шипол одложени се 200 летови.
Во западна Франција затворен е железничкиот сообраќај, а брзите возови (ТГВ) меѓу Париз и Ле Ман и Париз и Нант исто така не сообраќаат.
Ноќта од среда кон четврток во Бретања се забележани ветрови со брзина од 200 километри на час.
Во Шпанија, од невремето најповеќе е погодена Галиција, на северозапад, а на сила е црвено предупредување, како и во Баскија, каде беа измерени бранови од осум до девет метри.
Иако Португалија не беше „директно погодена“, властите издадоа црвено предупредување во крајбрежните области на северот на земјата.
(Фото: Глејн Кирк – Демиен Мејер / АФП)
