Во извештајот на „Фридом хаус“ за „Државите во транзиција за 2023“, кога станува збор за состојбата на демократијата, Србија остана на исто ниво, мали подобрувања се забележани во Албанија, Косово и Северна Македонија, а пад е забележан во Црна Гора и Босна и Херцеговина, објави Гласот на Америка.
Северна Македонија добила оценка 3.86 за демократски прогрес, а во претходниот извештај оваа оценка беше 3.82. Во категоријата национално демократско владеење државата добила оценка 3.50, за изборен процес 4.50, за граѓанско општество 4.75, за независни медиуми 3.50, за локално демократско управување 4.25, за судска рамка и независност 3.25, додека за корупција била оценета со 3.25.
Во Северна Македонија има силна политичка поларизација и парламентарните блокади, кои го попречуваат усвојувањето на законодавството на национално ниво, стои во извештајот на „Фридом Хаус“, и се додадва дека „прогресот на локалните власти во однос на транспарентноста, граѓанското учество и меѓуопштинската соработка, имал забележително позитивно влијание врз демократијата и исполнувањето на јавни услуги“.
Во регионот најдобро рангирана е Хрватска со 4,25, а најниска е Босна и Херцеговина со 3,21. Албанија и Црна Гора беа оценети со 3,79, исто како и Србија. Повеќето земји од Балканот се во категоријата влади во транзиција или хибридни режими.
Во извештајот се наведува дека долготрајниот процес на пристапување во Европската унија на Западен Балкан го зголемува разочарувањето од Унијата и ја ослабува нејзината моќ да поттикнува реформи.
Македонија во извештајот постигна скор од 48 поени од можни сто, а лани имаше 47 поени.
Од земјите во Западен Балкан, Северна Македонија е најдобро рангирана. Србија е на второто место со Црна Гора и Албанија.
Во извештајот се забележува и дека Северна Македонија и Црна Гора доживеале акутна политичка дисфункција во текот на 2022 година, но нивните резултати во демократскиот развој се движеле во спротивни насоки.
Фото:Најновиот извештај „Нации во транзиција“ на „Фридом Хаус“
