Италија претпазливо ги попушта мерките

Мерките ќе бидат олеснети во 12 „жолти“ региони со „среден“ ризик на зараза со корона вирусот, додека седум остануваат во „средно-висок“ или „висок“ ризик, до следното ревидирање на мерките на 15 мај, во зависност од движењето на пандемијата и бројот на вакцинирани.

Италија вчера изброи 16.232 новозаразени и 360 починати, но е нешто намален бројот на сместени на Клиниките за интензивна нега.

Новиот декрет којшто денеска го потпиша премиерот Марио Драги пресметува и ризик, за да се спаси нешто со парцијалното отварање, затоа што и секторот на услуги и жителите се на раб на пропаст од долгиот период во којшто се беше затворено.

Од 60 милиони италијански државјани до сега се вакцинирани со прва доза од вакцина 16,4 милиони, а со втората доза 4,8 милиони и не сите над 80 години.

Статистички, Италија после Јапонија има најстаро просечно старосно доба на населението.

Од 15 мај ќе се одлучува дали ќе се намали или ќе се укине полицискиот час кој засега останува на сила од 22 до 5 часот наутро, против што се бунат како опозицијата така и некои региони барајќи слободно движење до 23 часот.

Отварањето на училиштата, со пополнетост во зависност од ризикот во регионот од 50 отсто, а некаде и 100 отсто присуство, ќе биде вистински барометар како ќе се движи вирусот со оглед на тоа дека младите не се вакцинирани иако се ќе се одвива според строго утврдени мерки.

И првомајските празници што се за неколку денови ќе донесат јасна слика што се случува со пандемијата во Италија.

Од понеделник, во зависност од прогласениот ризик во регионите, планирано е отварање, само во „жолтите“ зони, на кафетериите и рестораните за ручек и вечера но само на отворено, отварање на театрите, кината и разни спектакли со само 50 отсто пополнетост од капацитетот, 500 лица максимално во затворен и 1.000 лица на отворен простор. Се отвараат музеите, училиштата и спортските центри на отворено. Таа радост ќе ја почуствуваат речиси 50 милиони Италијанци.

Оние кои сакаат да се движат од еден регион во друг ќе мора да поседуваат негативен ПЦР тест не постар од 48 часа или потврда дека се вакцинирани, таканаречениот „зелен сертификат“.

Дури од 15 мај, ако тоа го дозволи движењето на пандемијата, ќе се отворат плажите, базените на отворено, трговските центри за викенд, а од 1 јуни рестораните во затворен простор, теретаните со строго дезинфицирани справи после секоја поединечна употреба, спортските натпреварувања во сали со максимално присуство на 500 лица, а 1.000 лица на стадиони.

Од средината на јуни стадионите ќе бидат со една четвртина пополнетост, ќе се отворат сајмиштата, а од први јули ќе профункционираат конгресните центри и бањскиот туризам.