Македонија гори!

Пожарот што ја зафати Скопска Црна Гора, опустоши голема шумска површина помеѓу селата Раштак и Булачани, а уништи бачило и викендичка.

Пожар избувна и во Бразда, во близината на пречистителната станица за вода и почна да се шири кон викендичките, но навремено беше локализиран.

На граничната линија со Косово, кај местото Чешма Зенели оган уништи дабова и нискостеблеста шума во атарот на селото Белатоце. Дабова и борова шума гореа и кај делчевското село Разловци, како и кај кумановско Отња.

Според информациите од Центарот за управување со кризи, на територијата на Македонија беа активни шест пожари, во струшкиот, штипскиот, струмичкиот, велешкиот и кумановскиот регион.

Засега нема официјални информации за тоа колкава површина уништија пожарите и колкави се штетите. Нема информации ниту за тоа кои се причините за огновите, дали тие се случајни или се намерно предизвикани.

Главно, човечкиот фактор е на прво место кога станува збор за пожарите на отворено, а мотивите најчесто се да се покријат траги од недозволена сеча или да се направат нови пасишта.

Високите парични, а и затворски казни не ги одвраќа луѓето да посегнат по шумите.

Сезоната на летни шумски пожари „официјално“ почнува кон крајот на летото.

Лани во април биле регистрирани 38 пожари, од кои 20 шумски и 18 на отворен простор.