„Нисан“ гради фабрики за батерии во Јапонија и Британија

Јапонскиот производител на автомобили „Нисан“ ќе се здружи со кинескиот производител на батерии „Енвизион“ за изградба на нови фабрики за батерии за електрични возила во Јапонија и Велика Британија.

Инвестицијата ќе чини повеќе од 200 милијарди јени (1,8 милијарди долари).

Јапонската компанија ќе почне со производство на батерии во две нови постројки веќе во 2024 година, планирајќи вкупен капацитет кој е доволен за 700.000 електрични возила годишно, објави јапонскиот „Никеи“.

„’Нисан’ ќе продолжи да ја забрзува електрификацијата кон неутралност на јаглеродот, но засега немаме други планови да најавиме“, изјави портпаролот на компанијата.

Батериите се една од најскапите компоненти на електричните возила. Извршниот директор на „Рено“, партнерот на „Нисан“, Лука де Мео, изјави дека двете компании преговараат за зајакнување на соработката за намалување на трошоците со користење на истата батериска технологија, а директорот на „Нисан“, Ашвани Гупта, рече дека се договориле за заедничките спецификации на батериите.