Поранешниот мексикански министер Џенаро Гарсија Луна, некогаш истакнат борец во борбата против трговијата со дрога во неговата земја, поротата на судот во Њујорк го прогласи вчера за виновен за шверц на кокаин од Мексико во САД, за што му се заканува доживотен затвор.
Поротниците во федералниот суд во Бруклин пресудија дека тој поранешен министер за јавна безбедност на мексиканскиот претседател Фелипе Калдерон (2006-2012) е виновен по пет точки од обвинението, вклучително и тоа дека примил милиони долари за да го заштити картелот „Синалоа“ и дека е вмешан во криумчарење на најмалку 53 тони кокаин од Мексико во САД, од 2001 до 2012 година.
Гарсија Луна, кој не кажа ниту збор за време на сослушувањата, прогласен е за виновен по сите точки од обвинението, потврди федералното обвинителство во Бруклин во објава на Твитер.
Казната, која може да се движи од 10 години затвор до доживотен затвор, ќе биде позната во наредните недели.
Гарсија Луна е највисокиот мексикански функционер кому му се суди пред федералниот суд во Њујорк, кој влезе во војна со нарко-картелите од централна и јужна Америка кои со помош на локални министри шверцуваат дрога во САД.
Предметниот суд во Бруклин во 2019 година на доживотен затвор го осуди поранешниот водач на картелот „Синалоа“, Жоакин „Ел Чапо“ Гузман.
