Од Грција за Франција заминаа 106 бегалци

– Во присуство на францускиот амбасадор во Атина Патрик Мезонав и алтернативниот министер за миграција и азил на Грција, Јоргос Кумуцакос, 106 баратели на азил од Грција заминаа за Франција, јави дописничката на МИА од Атина.

Информацијата ја соопштија од амбасадата на Франција во Атина преку нивниот Твитер профил, но ја потврди и Кумуцакос во интервјуто за грчката телевизија „Скај“.

Во петокот  86 бегалци, односно деца со сериозни здравствени проблеми заедно со нивните семејства заминаа за Хановер, со што се финализираше конкретната програма за релокација на 1.024 баратели на азил што започна во јули.

Според податоците од Министерството за миграција и азил на Грција, за Германија досега заминале над 1.500 лица, а во следните месеци се очекува да се релоцираат 1.260 бегалци.