Руската војска презеде целосна контрола врз фабриката за кокс и хемикалии во Авдиивка, објавија утринава руските државни агенции, откако викендов, после неколку месеци разорни борби, голем дел од градот падна во рацете на руските сили.
Руските власти вчера соопштија дека го контролираат тој град во регионот на Доњецк, но дека украинските војници се уште се во фабриката, последното упориште на Украина на северозападните рабови на Авдиивка.
„Руските знамиња се истакнати на административните згради“, соопшти државната новинска агенција ТАСС, цитирајќи го Министерството за одбрана.
Државната новинска агенција РИА, пак, објави кратка звучна снимка од воздух на која се прикажани експлозии над објект кој би можел да биде индустриска фабрика.
Падот на Авдиивка е најголемата добивка на Русија откако претходно го зазеде градот Бахмут во мај лани и речиси две години откако претседателот, Владимир Путин, започна војна во Украина.
Авдиивка, градот што Русите го нарекуваат Авдеевка, пред војната имаше околу 32.000 жители, а накратко во 2014 година беше заземен од сепаратистите поддржани од Москва за повторно да го освојат украинските трупи и таму да изградат обемни утврдувања.
Авдиивка се наоѓа во индустрискиот регион Донбас, 15 километри северно од градот Доњецк, кој е под руска окупирација. Пред војната, фабриката за кокс од советско време беше една од најголемите во Европа.
Од Украина засега нема никаков коментар за завземањето, но во саботата генерал-полковникот Олександр Сирски, врховен командант на украинските вооружени сили, рече дека неговите трупи се вратиле на побезбедни позиции надвор од градот „за да избегнат опкружување и да ги заштитат животите и здравјето на војниците“.
