Вооружени лица отворија оган на пазар во југозападниот ирански град Изех, при што загинаа најмалку пет лица, меѓу кои една млада девојка, а беа повредени цивили и припадници на безбедносните сили.
Не е јасно што го мотивирало нападот или дали е поврзан со националните протести што го потресоа Иран во изминатите два месеци.
Во престрелката се ранети 10 лица, меѓу кои и полицајци, јави државната телевизија.
Валиола Хајати, заменик-гувернер на провинцијата Хузестан, во која што се наоѓа градот, изјави дека меѓу загинатите има една млада девојка и една жена.
Државната телевизија соопшти дека групи од неколку десетици демонстранти се собрале во различни делови на Изех доцна вчера, извикувајќи антивладини слогани и фрлајќи камења врз полицијата, која употреби солзавец за да ги растера.
Државните медиуми објавија и дека некој запалил шиитска верска богословија.
При некои протести избија жестоки судири, додека безбедносните сили го сузбиваа „несогласувањето“.
Во Иран неодамна имаше серија напади за кои се обвинети сепаратистите и верските екстремисти, вклучително и пукањето во големо шиитско светилиште минатиот месец, во кое загинаа повеќе од десет луѓе, а одговорноста ја презеде групата Исламска држава.
Демонстрациите започнаа на 16 септември со смртта на 22-годишната жена што беше уапсена од страна на „моралната полиција“, и тие брзо ескалираа во повици за соборување на владејачките ирански свештеници и за крај на теократијата воспоставена по Исламската револуција во 1979 година.
Властите сериозно ја ограничија работата на медиумите и повремено го прекинуваат интернетот, што го отежнува потврдувањето на деталите за немирите во различни делови на земјата.
Насилството во Изех се случи на вториот ден од тридневниот генерален штрајк на којшто повикаа демонстрантите. Штрајкот е во знак на сеќавање на претходната рунда на протести ширум земјата во 2019 година во кои беа убиени стотици демонстранти.
(Фото: „Профимедиа“)
