Обилните дождови предизвикаа поплави и лизгање на земјиштето во најнаселената индиска држава Утар Прадеш, во кои загинаа најмалку 12 лица, соопштија денеска властите.
Врнежите предизвикаа и прекини на електрична енергија, проблеми во сообраќајот и оштетувања на стотици станбени објакти, пренесува новинската агенција АП.
Училиштата се затворени во Лакнау, главниот град на државата Утар Прадеш, каде што во последните 24 часа наврнале 35 милиметри дожд.
Во овој град рано утринава се урнал покрив и ѕид од трошна куќа, каде што спиеле работници, при што девет лица починале, а три со тешки повреди се однесени во болница и задржани на лекување.
Во Унау, град на околу 40 километри југозападно од Лакнау, уште три лица го загубиле животот во уривање на куќа по обилните врнежи.
Претходно овој месец, во градот Бангалор, на југот на земјата, дводневните обилни дождови предизвикаа голем сообраќаен метеж, прекин на електричната енергија и огромни поплави кои ги загрозија куќите и ги поплавија патишта.
Монсунските дождови во Јужна Азија обично започнуваат во јуни.
Но, оваа година, силни врнежи го погодија североисточниот дел на Индија во март, а во Бангладеш во април имаше големи поплави.
За време на сезоната на монсуните, која завршува во октомври, стотици луѓе ги губат животите, а десетици илјади од нив остануваат без своите домови секоја година.
(Фото: Танјуг)
