Посебни правила за празниците и пократок полициски час

Постојните мерки за ограничување на движењето и мерките за примена на личната заштита за спречување на ширењето на КОВИД-19 истекуваат денеска, а вчера Кризниот штаб предложи нови, полицискиот час да почнува од 21 и да трае до 5 часот изутрината, да се отворат летните тераси на сите угостителки објекти, а за време на Велигден и Рамазан Бајрам, ноќта на 1 кон 2 мај и 12 кон 13 мај, да нема полициски час.

Сега на потег е Владата која на денешната седница треба да донесе конечна одлука.

Олабавувањето на мерките, според министерот за здравство Венко Филипче, се должи на подобрената епидемиолошка состојба, а тоа е резултат на, како што вели, навремено донесените мерки и димензионирањето на целокупниот систем на координација на приеми во болниците.

„Бројот на новозаболени од ковид се намалува, епидемиолошката крива е во опаѓање. Денеска има и помалку од 100 новодијагностицирани случаи. Сето тоа се чувствува и во болниците“, изјави вчера Филипче.

Филипче, патем, посочи дека се намалува притисокот кон болниците во внатрешноста со префрлање пациенти во скопските јавно здравствени институции и системот на координација меѓу клиниките.

„Почнаа да се ослободуваат одделенија кои беа дополнително ангажирани да сместат пациенти со корона вирус. Генерално, чувствуваме олабавување во смисла на намален притисок. Ги следиме трендовите и во околните држави, овој втор бран насекаде, во сите околни земји спласнува. Се надевам дека тоа, заедно со забрзаната вакцинација која ќе следи по Велигден, кога пред се ќе бидат дистрибуирани кинеските вакцини согласно бројот на пријавени во регионите, ќе ја смени сликата во целост“, рече министерот.

За Велигден и Рамазан Бајрам, рече, дека нема да има полициски час, а верските лидери зеле обврска сè што може да се организира надвор, тоа и да се стори и дека угостителските објекти ќе работат до 21 часот.

„Со ваков начин на организација и одговорноста на граѓаните ќе нема прекршување на мерките. Едноставно, сите со сопствената одговорност да покажеме дека може да се функционира и во присуство на вирус“, порача Филипче.

Претставници на Владата и на верските заедници вчера на средба констатираа дека преземените мерки за заштита на јавното здравје дадоа резултати, што го покажува намалувањето на бројот на заболени лица и на граѓани кои имаат потреба да бидат згрижени во болниците, со што се создаваат и можности за поспокојно одбележување на престојните празници.

Изразен бил заеднички став дека ваквата ситуација не значи и опуштање, поради што Владата и верските лидери на МПЦ и на ИВЗ апелираат до сите граѓани и понатаму да ги почитуваат мерките за заштита, затоа што од тоа ќе зависи и дали ќе има нови олабавувања на мерките и на полицискиот час.

 

(Фото: МИА)