Почнува скринингот за Македонија, прво е законодавството

LinkSense.mk

Во Брисел денеска официјално почнува скринингот за усогласеноста на македонското законодавство со тоа на Европската Унија. Тој, практично, е фаза на „дијагноза“ до каде сме и што треба да правиме и, според очекувањата од македонска страна, треба да заврши во ноември 2023 година.

„По 17 години чекање влеговме во нова фаза. Таа фаза – скринингот, е практично задолжителен дел на преговорите за членство во Европската Унија. Тоа не е нешто ново и не е нешто што се прави само за нас. Сите држави, особено во последниов период, коишто имаа или имаат активен процес на преговори поминаа низ овој процес на скрининг“, вели Вицепремиерот за европски прашања, Бојан Маричиќ за МИА.

Според вицепремиерот, досега сме усогласени околу 40 отсто, значи скоро половина, а тоа значи, вели, дека сме ги искористиле добро овие 17 години чекање за да ги почнеме преговорите и во некои области сме на исто ниво или на подобро ниво од државите кои веќе преговараат со години како Србија и Црна Гора.

„Затоа мислам дека овој скрининг е многу важен за да ја држиме нашата администрација во кондиција, но и целото општество со сите експерти, со цел граѓанското општество, академската јавност и бизнис заедницата да бидат активни и да го следат скринингот и да учествуваат во него. Тоа е многу важно затоа што од скринингот ни зависи како ќе изгледа листата на задачи, што треба да правиме. Ќе одиме дел по дел, фаза по фаза за сите поглавја. Очекуваме се да заврши во ноември 2023 година. Тоа е планот што заедно го направивме со Европската комисија“, рече Маричиќ.

Во однос на тоа дали се очекуваат потешкотии во некои области во усогласувањето на законодавството и каде имаме слабости, Маричиќ вели дека многу работа не очекува во вториот кластер – Внатрешниот пазар, а исто така и во првиот, којшто е најважен, а тоа се Темелните вредности.

„Кластерот ‘Темелни вредности’, прв се отвора, последен се затвора, отворен е низ целите преговори и напредокот во тој кластер го диктира напредокот во другите кластери. Но, мислам дека во ‘Внатрешен пазар’ имаме многу работа и во конкурентност и во иновации исто така. Во ‘Зелената агенда’, што е многу скап кластер, бара многу инвестирање во животната средина и технологии што се позитивни кон животната средина. Во кластерот ‘Земјоделие’ имаме цел еден битен дел и за државна помош и за субвенции, но и за стандардите во земјоделието. Секаде имаме многу работа, но во ‘Внатрешен пазар’ најмногу“, оценува вицепремиерот.

На прашањето кога очекува да почне процедурата за уставните измени, неопходни за отворање на кластерите, имајќи ја предвид и иницијативата за референдум од страна на ВМРО-ДПМНЕ за поништување на договорот со Бугарија, која, пак беше отфрлена од собранискиот спикер Талат Џафери, Маричиќ вели дека тоа воопшто нема да биде лесен процес и оти од нас зависи кога ќе продолжиме со евроинтегративниот процес.

„Ние имаме некој рок што сами си го зададовме, заедно со планот за скрининг, а тоа е до крајот на скринингот, значи до ноември 2023, до крајот на идната година практично да ги комплетираме уставните измени и јас мислам дека ќе успееме во тој рок да ги комплетираме. Тоа секако нема да биде воопшто лесен процес, но мислам дека секој пратеник и сите политички партии ќе бидат на висина на задачата затоа што сега од нас зависи кога ќе продолжиме. Нема веќе условувања или дополнителни нови услови од која било држава членка, вклучувајќи ја и Бугарија, туку јасно се дефинирани условите под кои ги водиме преговорите и под кои услови ќе го продолжиме после скринингот, рече Маричиќ.

 

 

 

 

 

 

(Фото: „Независен Весник“)