На поранешниот американски претседател Доналд Трамп му е дозволено да се врати на социјалните платформи Фејсбук и Инстаграм, од кои беше протеран поради упадот на неговите поддржувачи во американскиот Конгрес во 2021 година.
„Профилите на Трамп ќе бидат обновени ‘во наредните недели’“, рече вчера менаџерот на Мета.
На Трамп претходно му беше дозволено да се врати на својот омилен Твитер откако мрежата ја купи мултимилијардерот Илон Маск.
„Нашето општо правило е дека не сакаме да застанеме на патот на отворена, јавна и демократска расправа на платформите на Мета, посебно во контекст на изборите во демократските општества како што е тоа во САД“, напиша претседателот на Одделот за глобални прашања на компанијата, Ник Клег.
„На јавноста треба да и се дозволи да слушне што имаат да кажат нивните политичари – добро, лошо, грдо – за луѓето да можат да одлучат за кого да гласаат на изборите“, додаде Клег.
Мета му го укина пристапот на Трамп до профилите на 6 јануари 2021 година, кога стотици негови поддржувачи упаднаа во Капитол и нападнаа полицајци и пратеници додека Конгресот беше на седница за потврдување на изборните резултати.
Основачот на Фејсбук, Марк Цукерберг, тогаш изјави дека се плаши од можноста Трамп со својата реторика да предизвика ново насилство.
Мета во средата објави дека во мрежата ќе вгради „нова заштита за да спречи навреди“, а тоа вклучува и високи казни за прекршителите како што е Трамп, кому му се заканува двегодишна суспензија ако ги прекрши правилата на компанијата, а тоа значи и забрана за поттикнување на насилство.
Клег рече дека 45-тиот американски претседател „значително се повлекол во истапите“ откако бил блокиран.
Не е јасно дали и кога Трамп, кој основаше сопствена социјална платформа минатиот февруари, некогаш повторно ќе објави на Фејсбук или Инстаграм.
Но, Трамп сепак ја пофали одлуката на Мета на неговата мрежа (Truth Social Life).
(Фото: АФП)
