САД: Масовна имунизација на животни против Корона

Зоолошката градина во заливот во Сан Франциско своите мечки, тигри и творови ги имунизира против вирусот корона, во рамки на напорите во САД со експериментална вакцина да се заштити животинскиот вид.

Тигрите Џинџер и Моли се првите две животни во Зоолошката градина во Оукланд кои оваа недела добија вакцина, а дозите ги разви и донираше ветеринарната фармацевтска компанија „Зоетис“ од Њу Џерси, пренесува АП повикувајќи се на весникот „Сан Франциско хроникл“.

Раководителот на ветеринарната служба во Зоолошката градина, Алекс Херман, соопшти дека ниедно животно до сега не е заразно со вирусот, но дека сакаат да дејствуваат превентивно, па така тигрите, мечките, планинските лавови и творовите ја добиле првата од двете дози, а потоа ќе се вакцинираат и другите животни.

Таа во соопштението наведе дека Зоолошката градина користела бариери за дистанцирање, а персоналот носел заштитна опрема за да не ги загрози ретките видови и дека состојбата сега е многу поинаква кога животните можат подобро да се заштитат со оваа вакцина.

„Зоетис“ ќе донира повеќе од 11.000 дози за животни кои живеат во речиси 70 Зоолошки градини, како и во повеќе зимски градини, академски институции и владини организации сместени во 27 американски држави, се наведува во соопштението за печат.

Зоолошката градина во Сан Диего почна со имунизација на примати во јануари после епидемијата со ковид-19 меѓу крдото горили во својот Сафари парк, а големите мајмуни, кои делат 98 проценти од својата ДНК со луѓето, посебно се подложни на инфекции како и мачките.

Досегашните потврдени случаи со корона вирус кај животни вклучуваат горили, тигри и лавови во зоолошки градини, и домашни мачки и кучиња.

(Фото АП)