Министерот за внатрешни работи Оливер Спасовски информира дека биле издвоени 13 милиони евра од Буџетот на МВР за униформи, техничка опрема и возила. Вели, „имплементиравме високи европски стандарди на материјално-техничката опременост на македонската полиција“.
„Покрај комплет униформите (зимски јакни, високи специјални чизми, летни и зимски панталони, чевли со дебел и тенок ѓон, летни и зимски капи, кошули со краток и долг ракав, поло маички, полувисоки чевли, флуоресцентни елечиња) за полицијата, набавивме униформи и за припадниците на сите организациони единици, на САЕ „Тигар“, на ЕБР, ЕИП, ПЕП и Одделот за заштита на определени личности и објекти и за Одделот за воздухопловни единици“, напиша утрово Спасовски на Фејсбук.
Министерот за внатрешни работи потенцираше дека одговориле на потребите за нова техничка опрема и возила.
„Единицата за обука и поддршка (ЕОП) е опремена со возила и опрема за справување со нарушен јавен ред и мир. Со цел модернизација на Хеликоптерската единица за полициски намени извршен е генерален сервис на леталата, инсталирана е најнова дигитална комуникациска и навигациска опрема, и ведро и систем за гаснење на пожари. За потребите на Специјалната антитерористичка единица ‘Тигар’ извршена е набавка на интервентни возила, рачни радиостаници, тактички комплети“, наведе министерот.
За Единицата за брзо распоредување биле набавени транспортни комбиња, интервентни возила за јавен ред и мир, рачни радиостаници и машини и алати за механичарската работилница, а опремен е и просторот на базата со набавка на душеци, ќебиња и постелнини и професионални машини за перење.
Спасовски истакнува дека покрај ова сето ова, МВР во овој период од сопствениот буџет за потребите на Граничната полиција набави и четири пловни објекти со цврсто корито, од кои два 6,9 – 8 метри и два 6,4 – 7 метри, 4 приколки и гумен патролен чамец.
„Го модернизиравме и возниот парк на сите Сектори за внатрешни работи при МВР, со последната набавка на 20 интервентни комбиња опремени со најнова високософистицирана опрема согласно поставените високи стандарди на работа на македонската полиција“, напиша Спасовски.
Спасовски смета дека е остварена целта за создавање модерна, опремена, стручна, ефикасна, но и задоволна полиција, целосно сообразена со стандардите и нормите на современите и квалитетни европски и светски полициски практики. Мотивираноста на полициските службеници, како што напипша, се рефлектирала со високи резултати во безбедносната состојба на подрачјето на целата држава.
(Фото: Фејсбук на министерот Спасовски)