Српската репрезентација поради својот квалитет заслужува да се најде на едно од првите две места во групата и да се пласира во нокаут фазата на Светското првенство во Катар. Вака, во интервју за „Новости“, тврди Лука Миливојевиќ (31), капитен на англискиот премиерлигаш Кристал Палас, долгогодишен играч за врска во тој национален состав, чиј дел беше на Мундијалот пред четири години.
Пребрзо, вели, се вратиле од Русија во 2018 година, по само три натпревари, но во меѓувреме работите се промениле на подобро.
„Тогаш можевме да постигнеме повеќе, но со смената на тренерот Славољуб Муслин некои конци пукнаа. Тие грешки се во минатото“, истакнува Миливојевиќ, кој од 2012 до 2020 година настапил 38 пати за А селекцијата и постигна еден гол.
„Самото учество на првенството ме прави среќен, како и повторниот дуел со Бразил. Ме фасцинира играта на „орлите“ во последно време и едвај чекам да започне дуелот од првото коло. Недостатоците што ги имаше мојата генерација, тренерот Драган Стојковиќ успеа да ги препознае и поправи. Да не ме сфати некој погрешно, знаевме и да пружиме добри и атрактивни игри, но, како во решавачкиот меч со Швајцарија, некои чудни работи или недостаток на среќа не одделија од повисоката цел.“
„Петарда“ на Србија против Бахреин (5:1), на последниот тест натпревар пред Мундијалот, доволно го отсликува пристапот и карактерот на српските фудбалери.
„Имаме причини за оптимизам. Добивме добро познати противници. На претходниот Мундијал делевме група со Бразил и Швајцарија, а селекторот Стојковиќ добро знае дека никако не треба да има опуштање ниту за дуелот со Камерун. Бодовите од пресметката со африканската селекција би можеле да бидат решавачки кога ќе се одлучува за пласманот. Можеби не ни оди на рака редоследот на противниците, подобро ќе беше Бразил да беше на крајот, а не на почетокот. Сепак, можеме да се надигруваме со јужноамериканците и да ги совладаме со колективна игра. Имаме одлична атмосфера, тимски дух, а овие фактори на крајот би можеле да ни ја донесат улогата на најпријатното изненадување на Мундијалот.“
Миливојевиќ верува дека биле добро екипирани на сите линии. После подолго време сите позиции во селекцијата ги покривале по двајца или тројца подеднакво квалитетни играчи. Добро било и тоа што го подмладиле тимот, а не ги загубиле ниту системот, ниту принципите и балансот.
Тој се надева дека дуелот со Швајцарците ќе биде поинаков од оној од 2018 година (1:2). Очекува да ја чуваат топката и да ја контролираат играта.
„Имаме квалитетни играчи, можеби и најдобрите во шпицот. Очекувам да го решиме прашањето за победникот пред финишот. Сигурен сум дека нема да има ‘реприза’ со Швајцарците, дури и да го имаме најлошиот судија“, се потсети Миливојевиќ, кога, вели, не им бил досуден чист пенал после прекршок врз Митровиќ.
