Страшни поплави ја погодија североисточна Индија: Под вода 1.500 села

LinkSense.mk

Повеќе од 500.000 луѓе ги напуштија своите домови во индиската североисточна држава Асам поради големите поплави предизвикани од монсунските дождови во кои седум лица се удавија, утринава соопштија властите, предупредувајќи дека ситуацијата може да се влоши.

Една од најголемите реки во светот, Брамапутра, се излеа од коритата во Асам, поплавувајќи повеќе од 1.500 села.

Обилните дождови зафатија поголем дел од земјата.

Погодени се повеќе од 500.000 луѓе, а состојбата со поплавите од час во час станува се покритична“, изјави министерот за водни ресурси, Пиџуш Хазарика, додавајќи дека седум лица го загубиле животот во одделни инциденти во последните три дена.

Индиските војници спасија повеќе од 2.000 луѓе заробени во округот Хоџаи, изјави државниот министер за здравство Кешаб Маханта, истакнувајќи дека спасувачките напори продолжуваат.

Се очекува дополнително зголемување на нивото на водата во Брамапутра, соопштија националните власти.

Состојбата и понатаму е исклучително сериозна во најтешко погодената област Дима Хасао, каде се прекинати железничките и патните врски поради поплавите и лизгање на земјиштето“, соопштија властите.

Градовите на другите места во Индија, особено главниот град Њу Делхи, се погодени од топлотен бран.

 

 

 

 

 

(Фото: АФП)