Уште една успешно завршена трансплантација на срце во Македонија

Успешно заврши третата трансплантација на срце во историјата на нашата земја, информира македонскиот министер за здравство, Венко Филипче.

„Почна да чука новото срце во градите на 39-годишната жена на која утрово и беше извршена трансплантација. Тешката операција траеше пет часа. На пациентката и посакувам побрзо опоравување“, напиша министерот Филипче на Фејсбук.

Претходно,тој инфорираше дека утрово во 06.33 часот започна процесот за третата трансплантација на срце во историјата на нашата земја. На двајца пациенти ќе им се трансплантираат бубрези.

„Доцна синоќа заедно со моите колеги, Националната координаторка за трансплантација доц. д-р Маја Мојсова Мијовска и тимот кардиохирурзи – проф. д-р Сашко Јовев, академик д-р Жан Митрев, д-р Марјан Шокаровски, д-р Васил Папестиев и д-р Тања Анѓушева, ги направивме подготовките за трансплантација на срце и бубрези од мртов донор чие семејство даде согласност да се донираат органите на пациентот. На тимовите лекари кои ќе ги вршат трансплантациите им посакувам многу успех. Да им држиме среќа“, напиша Филипче во својот статус на Фејсбук.