Мохамед Амра, францускиот затвореник кој во вторникот утрината на филмски начин побегна од рацете на полицијата, е најбараниот човек во Франција. Во затвор беше поради серија провални кражби, главно во продавници и деловни простории. Но, протекуваат детали кои фрлаат нова светлина на целиот случај. Амра, се верува, е важна ѕверка во светот на француските шверцери на дрога. Зад петиците моментно му се стотици француски полицајци.
Тамошните медиуми пишуваат за неговата поврзаност со нарко-бандата која е со седиште во градот Марсеј на француската ривиера.
Овој 30-годишен маж беше ослободен во невидена акција од неговите криминални пријатели.
Неговите „деловни пријатели“ во вторникот околу 11 часот, значи сред бел ден, ги пресретнаа полициските возила кои го превезувале Амра, познат и по прекарот „Мува“, во друг затвор.
Пред тоа, бил фатен како се обидува да ги пресече затворските решетки.
Управата на затворот во кој се наоѓал одлучила дека треба да биде преместен, но по пат Амра бил ослободен, при што загинаа двајца полицајци, а тројца се во критична состојба во болница.
Францускиот министер за внатрешни работи, Жералд Дарманин, на „X“ напиша дека наредил активирање на планот „Епервиер“, специјална операција која се покренува во вакви ситуации.
„Се користат сите средства за да се пронајдат овие криминалци. Според моите упатства, мобилизирани се неколку стотици полицајци и жандарми“, изјави Дарманин за деталите од големиот лов по бегалецот, кој е во тек во Франција.
Нападот и ослободувањето на криминалецот се случи на северот на Франција во Нормандија.
Ивон Барбие, пензиониран сточар и сопственик на земјиште во близина на автопатот каде што беше ослободен Мува, за „Скај Њус“ изјави дека слушнал „30 или 40 многу силни истрели од огнено оружје“.
„Беше многу гласно, не се осмеливме да одиме да ја провериме стоката затоа што не сакав да ме застрелаат. Што можеа да направат тие затворски чувари? Имаа пиштоли, а тие другите имаа големо, сериозно оружје.“
Францускиот министер за правда, Ерик Дупон-Морети, за француските медиуми рече дека еден од загинатите полицајци имал 34 години и зад себе оставил бремена сопруга. Другиот, на возраст од 52 години, бил татко на две деца.
Медиумите го опишуваат Амра како „многу успешен бандит“. Во написите се споменува негова вмешаност во трговијата со дрога во Франција, а некои наведуваат дека бегалецот е карика во меѓународната трговија со дрога.
На судот во Марсеј беше обвинет за „грабнување што заврши со смрт“, поврзано со случајот со убиството на маж од Друкс во близина на Роуен.
„Мува“ е осомничен и дека во јуни 2022 година наредил убиство на подрачјето на Сен-Етиен-ду-Рувреј, во Нормандија. Неофицијално се поврзува со банда од Марсеј.
Амра, меѓу другото, се сомничи и дека е нарачател на атентат на француски државјанин во Шпанија, минатата година.
Овој релативно млад криминалец претходно 13 пати бил осудуван за помали прекршоци, како возење без дозвола, кражби и одбивање на наредби на полицијата да застане и да се легитимира. Меѓутоа, не се сметал за „радикализиран“ затвореник, барем така тврдат полициски извори во интервју за францускиот весник „Ле Фигаро“.
Поради обидот да ги пресече решетките во затворската ќелија, побарано е тој да биде префрлен во т.н. „дисциплински оддел“. Степенот на неговиот надзор е подигнат на трето ниво, што е едно скалило под нивото „посебен (или специјален) надзор“, кое е резервирано за најопасните затвореници во земјата, пренесува британски „Телеграф“.
„Додека трае големиот лов на бегалецот, француската полиција откри два запалени автомобили што ги користеле напаѓачите.
Едно од возилата, ‘пежо’, било употребено за да удри во полициското комбе. Второто, ‘ауди’, го следело транспортот на ‘Мувата’ и во него имало двајца вооружени напаѓачи“, изјави париската обвинителка Лоре Бекуа на конференцијата за новинари.
На снимката од надзорните камери се гледа целиот настан, односно бело затворско комбе во кое директно удрило црното „пежо“ додека возилото минувало низ наплатната рампа. Другиот автомобил на затворската управа, како што се гледа на видеото, го следи комбето, но се заглавува. Во истиот момент, од „пежото“ ислегуваат двајца мажи, додека други двајца одат до задниот дел од автомобилот што ги следел. Сите напаѓачи се облечени во црно, носат марами на лице и автоматско оружје. Доаѓа до судир со полицајците кои го следат „Мува“, а тоа завршува кобно за двајца полицајци.
Поради настанот, вчера, среда, беше прогласен за ден на блокади. Колоквијално наречен уште и „ден на мртвите затвори“, најавено беше дека ќе се одржи во затворите низ Франција, затоа што синдикатите на затворските службеници бесно реагираа на овој напад.
Локалните медиуми известија за демонстрации опред затворите низ земјата – вклучувајќи ги и оние во главниот град Париз, во Роуен, Ница, Грасеј, Драгињан и Амиенс.
Едноминутно молчење беше планирано во целиот француски казненоправен систем, вклучувајќи ги затворите и судниците.
Интересно е, инцидентот се случи истиот ден кога во францускиот Сенат беше објавен извештај во кој се предупредува дека владините мерки не успеале да го спречат процутот на наркотичката индустрија во Франција.
Претседателот на Одборот, Жером Дурен, рече дека Франција „сè уште не е нарко-држава“, но трговијата со дрога сепак претставува „директна закана за националните интереси“. Додаде и дека владините мерки против дрогата „не се во склад со предизвиците“.
„Законот и редот се главното прашање на француската политика во пресрет на европските избори следниот месец, а заседата и нападот на затворското комбе предизвикаа жестоки реакции кај политичарите, особено кај екстремната десница“, пишува „Франс 24“.
„Тоа е вистинско дивјаштво кое секој ден ја погодува Франција“, изјави Џордан Бардела, главниот кандидат на крајно десничарскиот Национален собир, кој води во предизборните анкети.
Меѓутоа, ова не е проблем што ја засега само Франција.
„Поплавата од кокаин, дрога кога од година во година е се повеќе во Европа, го поттикна организираниот криминал низ Стариот континент, а тоа доведе до се пожестоки судири со полицијата и смртоносни пресметки меѓу банди“, потсетува швајцарскиот „Свисинфо.цх“.
„Овој брутален напад покажува дека заканата од организиран криминал е исто толку голема колку и терористичката закана“, напиша комесарката за внатрешни работи на Европската унија, Илва Јохансон, на „X“, коментирајќи го настанот на северот на Франција.
„Мораме да се соочиме со оваа закана со иста решителност“, порача Јохансон.
Во извештајот на Сенатот стои дека во изминатите десет години има петкратно зголемување на заплените на кокаин во Франција и дека француската трговија со дрога имала годишен обрт од 3,5 милијарди евра.
Со оглед на тоа дека земјата е на „пресвртна точка“, препорачано е создавање на француска верзија на американската Управа за сузбивање на дрогата (ДЕА).
Марсеј е, се наведува во сите извештаи, епицентарот на насилството на француските банди, со посебно насилна војна меѓу бандите на трговци со луѓе.
(Фото: Паскал Гијот / Ален Жокард – АФП)
