Премиерот Зоран Заев денеска се сретна со амбасадорката на Канада во Република Македонија, со седиште во Белград, Кати Чаба, со која разговараше за актуелните политички процеси во земјата и беше потврден заемниот интерес за унапредување на билатералната соработка меѓу двете земји.
Премиерот Заев, потенцирајќи ја големата пријателска поддршка од Канада, ја информираше амбасадорката Чаба за активностите за спроведување на претстојниот референдум и нагласи дека очекува на 30 септември, граѓаните да излезат, да го искористат своето демократско право и да гласаат одговорно, препознавајќи го историскиот момент, кога е потребно секој да се вклучи и слободно да се изјасни.
Нејзината екселенција, амбасадорката Чаба, оцени дека Македонија по потпишувањето на договорите со Грција и Бугарија е позитивен пример за целиот регион на Југоисточна Европа во насока на решавање на отворените прашања, обезбедување стабилност што несомнено позитивно влијае на продлабочување на економската соработка меѓу земјите.
Амбасадорката Чаба ја пренесе канадската поддршка за реформската агенда на Владата на Република Македонија и истакна дека Канада ја очекува Република Македонија како 30-та земја членка на НАТО, оценувајќи дека тоа ќе биде значаен придонес кон стабилноста и безбедноста на земјата, но и на целиот регион.
Премиерот Заев ја повтори заложбата на Владата да остане фокусирана на обезбедување на конкретни и одржливи резултати во правец на реформите во областа на судството, безбедносните служби, јавната администрација, слободата на говорот и подобрување на условите на медиумите и обезбедување независност, како и продолжување на напорите за интензивирање на борбата против корупцијата, како одраз на напорите за градење на Македонија како европска и демократска.
На средбата, се разговараше и беше потврден заемниот интерес за унапредување на билатералната соработка во повеќе конкретни области, беше ставен значаен фокус на економската соработка меѓу Македонија и Канада во претстојниот период, како и натамошно продолжување на успешната мултилатерална соработка.
