Швајцарија: Полицијата претресува куќи поради корупција за Мундијалот во 2006-та

Швајцарската полиција во рамки на истрагата заради сомневање за корупција околу организацијата на Светското првенство во Германија, направила претрес во неколку куќи сопственост на некогашни функционери во ФИФА.

Истрагата е насочена кон членови на организацискиот одбор на Мундијалот во 2006 година, меѓу кои е и легендарниот германски фудбалер Франц Бекенбауер, а проширена е и кон некогашниот генерален секретар на ФИФА, Урс Линси.

Франц Бекенбауер
Франц Бекенбауер

Постојат сомневања дека се купувале гласови за Германија да ја добие организацијата на Светското првенство.
Под истрага се и две лица чии имиња полицијата не ги соопштува.

Урс Лински, поранешен генерален секретар на ФИФА
Урс Лински, поранешен генерален секретар на ФИФА

„Пребарани се куќи на различни локации во Швајцарија, каде што се зборува германски јазик во рамки на истрагата која е покрената минатата година, поврзана со тврдењата за измами, криминал, перење пари и проневери“, стои во соопштението на швајцарското обвинителство.

Истрагата е отворена во ноември минатата година и, пред се, е насочена кон Бекенбауер затоа што бил на чело на одборот за кандидатура околу добивање на Светското првенство, но и на останатите членови – Ханс Рудолф Шмит, Тео Цванцигер и Волфранг Ниерсбаха.

Сега постојат сомнежи за вмешаност и на Линси кој до минатата недела беше претседател на една банка во Цирих.

Пребарувањето на домовите поврзано е со исплатата на 6,7 милиони евра, пари што Фудбалскиот сојуз му ги дал на Роберто Луис-Драјфус, некогаш прв човек на „Адидас“ и заговорник за организација на Мундијалот.