Нема да постои договор доколку не се прифати ерга омнес и уставна ревизија, вели портпаролот на грчката Влада и министер без ресор, Димитрис Ѕанакопулос, во интервју за грчката телевизија „Епсилон“.
Во интервјуто Ѕанакопулос објаснува дека во овој момент не постои договор и затоа избегна да навлегува во детали што се однесуваат на евентуалното решение.
„Додека не се договори се, не е договорено ништо. Така е во преговорите. Но, она што со целосна сигурност можам да го кажам е дека ерга омнес и уставна ревизија се важни, односно главни предуслови за да може да постои било каков договор со поранешната југословенска Република Македонија, рече Ѕанакопулос.
Според него, треба да се донесат конечните политички одлуки, бидејќи не станува збор за едноставен договор, туку договор со многу технички и правни, но и политички прашања, „кои секоја страна треба да ги има добро и внимателно проучено“.
„Во овој момент не постои договор. Кога ќе има договор ќе ги дискутираме сите аспекти, сите детали. Ќе го соопштиме договорот, ќе ги информираме политичките лидери, ќе го известиме грчкиот народ и тогаш ќе можеме да имаме јасна дискусија за сите аспекти, за сите детали и за сите прашања што ќе се однесуваат на договорот – рече портпаролот на грчката Влада и одби да коментира дали Грција прифаќа идентитетот и јазикот да бидат македонски.
Сепак во однос на јазикот, го спомена она што и шефот на грчката дипломатија го има потенцирано дека „македонскиот јазик е признаен од 1977 во Обединети нации за време на владата на Константинос Караманлис“.
Ѕанакопулос истакна дека не сака да го предвиди исходот на преговорите кои во овој момент се на степен на премиери.
Прашан за ставот на македонскиот претседател, портпаролот на грчката Влада вели дека реакцијата на Иванов, треба да се види од друг аспект.
„Се прашувам како е можно претседателот Иванов да има толку силна реакција за еден договор што во Грција некои го сметаат за договор што им штети на националните интереси.
„Сакам да кажам дека ако го видите ова на друг начин, реакцијата на претседателот Иванов значи дека грчката Влада преговараше добро, грчката Влада се обиде да земе договор што му служи на националниот интерес“ рече, Ѕанакопулос.
